ہرارے ، 25 جولائی :) زمبابوے کے خلاف دوسرے ٹی-20 میچ میں فتح اور تین میچوں کی سیریز میں 2-0 کی ناقابلِ شکست برتری حاصل کرنے کے بعد ہندستانی کپتان شریاس ایئر نے کہا کہ سیریز جیتنا ایک خوشگوار احساس ہے ۔ شریاس ایئر نے میچ کے بعد کہا، ''ہم نے آج بہت اچھی کامیابی حاصل کی۔ ایشان کشن اور تلک ورما نے جس انداز میں بلے بازی کی، ان کے کئی شاٹس دیکھ کر لطف آیا۔ اس کے بعد ہمارے گیندبازوں نے منصوبے کے مطابق عمدہ گیندبازی کی۔ رویہ بہت اہم ہوتا ہے ، ماضی کو پیچھے چھوڑ کر حال پر توجہ دینا ضروری ہے ۔ کل ایک اور میچ ہے ، اس لیے ہماری توجہ اب اگلے مقابلے پر ہے ۔'' ٹیم میں ممکنہ تبدیلیوں کے سوال پر انہوں نے کہا، ''ابھی تک کوئی فیصلہ نہیں کیا گیا ہے ، لیکن ہمارا ایک کھلاڑی زخمی ہو گیا ہے ، اس لیے کل کے میچ میں کچھ تبدیلیاں دیکھنے کو مل سکتی ہیں۔'' پلیئر آف دی میچ ایشان کشن نے کہا، ''جب آپ ٹیم کے لیے رنز بناتے ہیں تو اس سے ٹیم کا مجموعی اسکور بھی بہتر ہوتا ہے اور ٹیم کی جیت میں اپنا کردار ادا کرنا ہمیشہ خوشی کی بات ہوتی ہے ۔ ہمارا ہدف 180 رنز کے آس پاس تھا کیونکہ وکٹ بلے بازی کے لیے زیادہ آسان نہیں تھی، اس لیے ہماری توجہ اچھی شراکت قائم کرنے پر رہی۔ وکٹ کے بارے میں زیادہ سوچنے کے بجائے حالات کے مطابق بلے بازی کرنی چاہیے اور یہ دیکھنا چاہیے کہ کس گیندباز کو نشانہ بنایا جا سکتا ہے ۔ مایانک، یش ٹھاکر اور پرنس نے بہترین گیندبازی کی اور میدان میں بھی عمدہ کارکردگی دکھائی۔'' شکست پر مایوسی کا اظہار کرتے ہوئے زمبابوے کے کپتان سکندر رضا نے کہا، ''ہمارے گیندبازوں نے اچھی گیندبازی کی، لیکن ہندوستانی بلے بازوں نے جس مہارت کا مظاہرہ کیا اس کا کریڈٹ انہیں جاتا ہے ۔ گیندبازوں کو فیلڈنگ سے مزید بہتر تعاون کی ضرورت تھی۔ ایشان کشن اور تلک ورما نے شاندار بلے بازی کی، ان کی مہارت سے بہت کچھ سیکھا جا سکتا ہے اور ہم اپنی کارکردگی کو مزید بہتر بنا سکتے ہیں۔ تجربے کی کمی کے ساتھ ساتھ شاٹ کے انتخاب میں بھی ہم سے غلطیاں ہوئیں، اور بطور کپتان میں بھی اچھی بلے بازی نہیں کر سکا۔ امید ہے کہ آئندہ ہم بہتر کھیل پیش کریں گے ۔''

Source: Admin