نئی دہلی ۔ 25 اکٹوبر (ایجنسیز) دہلی کی جامعہ ملیہ اسلامیہ یونیورسٹی کے طلبہ نے طلبہ یونین کے مطالبہ کو لےکر اتوار کو 14ویں دن بھی اپنا احتجاج جاری رکھا۔ کئی طلبہ بھوک ہڑتال پر بھی ہیں۔ ہفتہ کو یونیورسٹی کے تدریسی اور غیر تدریسی عملے نے طلباءسے ملاقات کی اور انہیں احتجاج ختم کرنے پر زور دیا۔ تاہم طلباءنے احتجاج ختم نہیں کیا۔احتجاج کرنے والے طلباءمیں سے ایک عادل رضوی نے کہا کہ ہماری بھوک ہڑتال کا یہ 14 واں دن ہے۔ انہوں نے الزام لگایا کہ سیکورٹی گارڈز نے ہمارے خیمہ کو گرانے کی کوشش کی جس پر ہم نے جوابی کارروائی کی۔ انہوں نے ہمارے ساتھ بدسلوکی کی اور ہمیں پینے کے پانی تک رسائی سے انکار کیا۔ تمام دروازے بند کر دیے گئے ہیں، کسی بھی طالب علم کو داخل ہونے یا باہر جانے سے روک دیا گیا ہے۔ ”کیا ہم یہاں طالب علم نہیں ہیں؟“
ان کا مزید کہنا تھا کہ 'گزشتہ روز یونیورسٹی کا تدریسی عملہ ہم سے ملنے آیا اور ہمیں اپنا احتجاج ختم کرنے کا کہا، ہم نے مطالبہ کیا کہ وہ ہمیں تحریری یقین دہانی کرائیں کہ ہمارے مطالبات پورے کیے جائیں گے، اس کے بعد ہی ہم احتجاج ختم کریں گے، ورنہ ہم اپنی بھوک ہڑتال جاری رکھیں گے'۔