امریکی صدر ڈونلڈ ٹرمپ کی جانب سے ایران پر دوبارہ حملوں کے امکان کے اشاروں کے درمیان بحیرہ عرب میں موجود امریکی طیارہ بردار بحری جہاز ’’یو ایس ایس جارج واشنگٹن‘‘ کے کمانڈر نے تصدیق کی ہے کہ جہاز دفاعی یا پیشگی کارروائی کے لیے تیار ہے۔

کیپٹن نکولس ڈیلیو نے اخبار ’’وال اسٹریٹ جرنل‘‘ کو دیے گئے انٹرویو میں کہا کہ امریکی فوج کا موجودہ مشن مختلف آپشنز تیار کرنا اور انہیں صدر ڈونلڈ ٹرمپ کے سامنے پیش کرنا ہے۔

وال اسٹریٹ جرنل نے انکشاف کیا ہے کہ امریکی طیارہ بردار بحری جہاز ’’یو ایس ایس جارج واشنگٹن‘‘ نے ایران کے حوالے سے وائٹ ہاؤس کے کسی بھی فیصلے کی تیاری کے لیے اسلحے اور ضروری سامان کی بڑے پیمانے پر فراہمی شروع کر دی ہے۔

امریکی اخبار کے مطابق اس میں دور سے زمینی اہداف کو نشانہ بنانے والے میزائلوں کی بڑی تعداد کے علاوہ مضبوط بنکرز اور زیر زمین تنصیبات کو تباہ کرنے والے بم بھی شامل ہیں۔

امریکی صدر ڈونلڈ ٹرمپ نے تنازع کی تازہ صورت حال پر اپنے حالیہ بیان میں فیصلہ تہران کی قیادت پر چھوڑتے ہوئے کہا کہ امریکہ کو ایران میں اپنا مشن فوجی کارروائی کے ذریعے مکمل کرنا پڑ سکتا ہے یا پھر کوئی معاہدہ کرنا ہوگا۔ انہوں نے زور دیا کہ اس کا فیصلہ ایران کو کرنا ہے۔

ٹرمپ نے کہا کہ انہیں یقین نہیں کہ ایران واشنگٹن کے ساتھ معاہدہ کرے گا یا نہیں، تاہم انہوں نے واضح کیا کہ دونوں صورتوں میں امریکہ اپنا مقصد حاصل کر لے گا۔

ٹرمپ نے ایران کے خلاف کسی ممکنہ فوجی کارروائی کے وقت کے بارے میں بتانے سے بھی گریز کیا اور کہا کہ تمام آپشنز اب بھی زیر غور ہیں۔

ایران پر ممکنہ حملے کی منصوبہ بندی میں امریکہ کی پیش رفت سے متعلق سوال کے جواب میں ٹرمپ نے کہا، ’’کیا آپ واقعی سمجھتے ہیں کہ میں آپ کو یہ بتاؤں گا؟‘‘

ٹرمپ نے مزید کہا کیا یہ ممکن ہے کہ ’وال اسٹریٹ جرنل‘ کا کوئی شخص اس قدر احمقانہ سوال کرے؟ ہم کس حد تک پہنچ چکے ہیں؟ میں آپ کو واضح کر دوں، کیا ہم ایسا کرنے کے بارے میں سوچ رہے ہیں؟ شاید کل ہی! کیا آپ واقعی سمجھتے ہیں کہ میں آپ کو بتاؤں گا؟

انہوں نے کہا اگر میں یہ قدم اٹھانے کا ارادہ رکھتا ہوں۔ جس کا امکان موجود ہے، تو یہ امکان بھی ہے کہ ہم ایک شاندار، بڑا اور اچھا معاہدہ کر لیں۔ وہ معاہدہ کرنا چاہتے ہیں، لیکن مسئلہ یہ ہے کہ کیا وہ اس معاہدے کی پابندی کریں گے؟