اسرائیلی وزیر اعظم نیتن یاہو نے ویڈیو جاری کر کے اپنی موت کی افواہوں کی تردید کر دی

تل ابیب: ایران اور اسرائیل کے درمیان جاری کشیدگی کے دوران اسرائیل کے وزیرِ اعظم بنجامن نیتن یاہو کی موت سے متعلق سوشل میڈیا پر گردش کرنے والی خبروں کی خود نیتن یاہو نے تردید کر دی ہے۔ انہوں نے ایک نئی ویڈیو جاری کرتے ہوئے واضح کیا کہ وہ زندہ اور خیریت سے ہیں اور ان کی موت سے متعلق پھیلائی جانے والی خبریں محض افواہیں ہیں۔ رپورٹس کے مطابق ایران اور پاکستان کے بعض میڈیا پلیٹ فارمز پر یہ دعویٰ کیا جا رہا تھا کہ ایران کی فوجی کارروائی کے دوران نیتن یاہو ہلاک ہو گئے ہیں۔ اس کے علاوہ سوشل میڈیا پر ایک مصنوعی ذہانت کے ذریعے تیار کردہ ویڈیو بھی وائرل ہوئی جس میں ان کی موت کا تاثر دیا گیا تھا۔ ان افواہوں کے جواب میں نیتن یاہو نے اتوار کے روز ایک کافی شاپ میں بیٹھ کر ویڈیو ریکارڈ کی اور اسے جاری کیا۔ ویڈیو میں وہ کافی پیتے ہوئے نظر آ رہے ہیں اور مزاحیہ انداز میں ان افواہوں پر ردِ عمل دیتے ہوئے کہتے ہیں کہ “میں تو صرف کافی کے لیے مرا ہوں”۔ انہوں نے عبرانی زبان میں اشاروں کے ذریعے بھی واضح کیا کہ ان کی موت سے متعلق تمام خبریں بے بنیاد ہیں۔ ویڈیو میں انہوں نے اپنے ہاتھ کی انگلیاں کیمرے کے سامنے دکھاتے ہوئے طنزیہ انداز میں کہا کہ “دیکھ لیجیے، میرے ہاتھوں میں اب بھی دس ہی انگلیاں ہیں”۔ یہ بیان اس وائرل ویڈیو پر طنز تھا جس میں انہیں غیر حقیقی انداز میں چھ ہاتھوں کے ساتھ دکھایا گیا تھا۔ ادھر اسرائیلی وزیرِ اعظم کے دفتر نے بھی ایک سرکاری بیان جاری کرتے ہوئے کہا ہے کہ نیتن یاہو کی موت سے متعلق تمام خبریں مکمل طور پر جھوٹی اور بے بنیاد ہیں۔ بیان میں کہا گیا کہ وزیرِ اعظم زندہ ہیں اور اپنی ذمہ داریاں انجام دے رہے ہیں۔ یہ افواہیں اس وقت سامنے آئیں جب ایران کی جانب سے یہ بیان دیا گیا تھا کہ وہ اپنے سپریم لیڈر آیت اللہ علی خامنہ ای کے قتل کا بدلہ لینے کے لیے اسرائیلی وزیرِ اعظم کو نشانہ بنا سکتا ہے۔ اسی پس منظر میں سوشل میڈیا پر نیتن یاہو کی موت سے متعلق مختلف دعوے گردش کرنے لگے تھے۔

Source: social media