واشنگٹن:
وزیراعظم نریندر مودی اور ایرانی صدر مسعود پزشکیان کے درمیان حالیہ ملاقات کے چند روز بعد امریکی وزیر خارجہ مارکو روبیو نے بھارت سمیت دیگر ممالک کو خبردار کیا ہے کہ وہ ایران کو آمدنی پیدا کرنے یا امریکی پابندیوں سے بچنے میں مدد دینے سے گریز کریں۔

امریکی وزیر خارجہ نے یہ بات 'دی برائن کلمیڈ شو' میں اینکر برائن کلمیڈ کے ساتھ ایک انٹرویو کے دوران اس وقت کہی، جب ان سے وزیراعظم مودی اور ایرانی صدر کے درمیان ملاقات اور نئی دہلی کی جانب سے تہران کے ساتھ ممکنہ نئے تجارتی معاہدے کی کوششوں کے بارے میں پوچھا گیا۔
مارکو روبیو کا کہنا تھا:

"میرا نہیں خیال کہ بھارت اور ایران کے درمیان فی الحال کوئی تجارتی معاہدہ ہوا ہے۔"

انہوں نے مزید اعتراف کیا کہ تمام ممالک کو اپنی خارجہ پالیسی کی تشکیل اور تہران کے ساتھ روابط قائم رکھنے کا پورا حق حاصل ہے، اور خود امریکا نے بھی سابقہ بات چیت کے دوران ایرانی حکومت کے نمائندوں سے رابطہ کیا ہے۔ تاہم، انہوں نے ان معاشی سرگرمیوں پر واضح سرخ لکیر کھینچ دی جو واشنگٹن کے نزدیک ایران کو امریکی پابندیوں سے نکلنے کا راستہ فراہم کر سکتی ہیں۔
یہ انتباہ ایک ایسے وقت میں سامنے آیا ہے جب ڈونلڈ ٹرمپ انتظامیہ نے ایران پر اپنے معاشی دباؤ کی مہم کو بے حد تیز کر دیا ہے۔ امریکا نے ان تمام ممالک اور کمپنیوں کو تنبیہ کی ہے جو تہران کے ساتھ کاروبار جاری رکھیں گی، کہ انہیں ثانوی (سیکنڈری) پابندیوں کا سامنا کرنا پڑ سکتا ہے۔

امریکی وزیر خزانہ اسکاٹ بیسنٹ نے 24 اگست کو "آپریشن ایکنامک آؤٹ کاسٹ" کا آغاز کیا، جسے انہوں نے ایران کی معاشی شریانیں کاٹنے کے لیے ایک "اقتصادی ڈی ڈے" (ایک اہم ترین آپریشن) قرار دیا۔

واشنگٹن کا موقف ہے کہ ایران کے ساتھ کسی بھی قسم کے معاشی و تجارتی اشتراک کو برداشت نہیں کیا جائے گا جو اس کی معیشت کے لیے مددگار ثابت ہو۔

فی الحال، بھارتی حکومت کی جانب سے امریکی وزیر خارجہ کے اس بیان پر کوئی باضابطہ ردعمل سامنے نہیں آیا ہے۔