نئی دہلی:
سابق سینیئر بیوروکریٹ اشش جوشی کو دہلی پولیس کے اسپیشل سیل نے بدھ کی صبح نهرو پارک سے اس وقت حراست میں لے لیا جب وہ معمول کی صبح کی سیر کے لیے نکلے تھے۔ کئی گھنٹوں کی تفتیش اور پوچھ گچھ کے بعد انہیں رات کو واپس گھر چھوڑ دیا گیا۔
گھر پہنچنے کے بعد اشش جوشی نے سوشل میڈیا پلیٹ فارم (ایکس) پر ایک پیغام جاری کرتے ہوئے لکھا:"ابھی ابھی گھر پہنچا ہوں۔ دہلی پولیس کا اسپیشل سیل مجھے گھر چھوڑ کر گیا ہے۔ تفصیلاں بعد میں شیئر کروں گا۔"

بعد ازاں، رات کے وقت اشش جوشی نے ایک اور پوسٹ کی جس میں انہوں نے پولیس کے رویے اور طریقہ کار پر شدید تحفظات کا اظہار کیا۔ انہوں نے دہلی پولیس کمشنر انوراگ کمار کو ٹیگ کرتے ہوئے لکھا کہ "تفتیش یا حراست کے دوران کسی بھی شخص کے گھر والوں کو اطلاع دینا ایک قانونی فرض ہے، کوئی اختیاری مہربانی نہیں۔ کل صبح سیر کے دوران مجھے یہ کہہ کر ساتھ لے جایا گیا کہ اس میں بہت کم وقت لگے گا۔ لیکن جیسے جیسے گھنٹے گزرتے گئے اور میں نے بار بار اپنی اہلیہ کو اطلاع دینے کی درخواست کی، تو متعلقہ اہلکاروں نے صرف یہی جواب دیا کہ وہ 'اوپر سے ملنے والی ہدایات پر عمل کر رہے ہیں'۔ مجھے شام 6:38 بجے جا کر پہلی فون کال کرنے کی اجازت دی گئی، جس کی وجہ سے میرا خاندان اور دوست پورا دن شدید تشویش اور خوف میں مبتلا رہے۔"

انہوں نے مزید کہا: "میں پولیس کمشنر سے درخواست کرتا ہوں کہ تمام یونٹس کو واضح ہدایات جاری کی جائیں تاکہ وہ حراست میں لیے گئے شخص کے اہل خانہ کو فوری اطلاع دینے کی قانونی ذمہ داری پر سختی سے عمل کریں، اور کسی دوسرے شہری کے خاندان کو اس ذہنی اذیت کا سامنا نہ کرنا پڑے جو میرے اہل خانہ نے سہی۔"

اس سے قبل، کانگریس کے سینیئر رہنما سندیپ ڈکشت نے خبر رساں ایجنسی (پی ٹی آئی) سے بات کرتے ہوئے دعویٰ کیا تھا کہ اشش جوشی کو نہرو پارک سے دہلی پولیس کے دو کانسٹیبل اٹھا کر لے گئے ہیں اور ان کے ٹھکانے کا کچھ پتہ نہیں چل رہا۔
اشش جوشی نے صبح انہیں کال کی تھی، لیکن وہ فون نہ اٹھا سکے۔ بعد میں جب انہوں نے واپس کال کی تو جوشی کا فون بند آ رہا تھا۔ جوشی کے ساتھ سیر کرنے والے ایک عینی شاہد نے ان کے گھر والوں کو بتایا کہ دو پولیس اہلکار آئے اور ایک حالیہ ٹویٹ/پوسٹ کے سلسلے میں پوچھ گچھ کی بات کہہ کر انہیں ساتھ لے گئے۔ پولیس اہلکاروں نے جوشی کو ان کی اپنی ہی گاڑی میں بٹھایا اور نیو فرینڈز کالونی کے اسپیشل سیل پولیس اسٹیشن لے گئے۔ سندیپ ڈکشت نے الزام لگایا کہ جب ان کی ٹیم اور وکلاء نیو فرینڈز کالونی پولیس اسٹیشن پہنچے تو کسی بھی اہلکار نے اشش جوشی کی موجودگی یا ان کے بارے میں کوئی معلومات دینے سے انکار کر دیا۔ تاہم، اس تمام معاملے پر دہلی پولیس کی جانب سے اشش جوشی کو حراست میں لیے جانے کی وجوہات یا سندیپ ڈکشت کے الزامات پر رسمی طور پر کوئی باضابطہ بیان جاری نہیں کیا گیا ہے۔