نئی دہلی:
2019 میں پاک بھارت فضائی معرکے کے دوران اہم کردار ادا کرنے والے بھارتی فضائیہ (IAF) کے سینیئر افسر گروپ کیپٹن ابھینندن ورتھمان نے انڈین ایئر فورس کو خیرباد کہہ دیا ہے اور ایک نجی ایئرلائن میں شمولیت اختیار کر لی ہے۔

ابھینندن ورتھمان نے 31 مارچ کو بھارتی فضائیہ سے استعفیٰ دیا (ریٹائرمنٹ لی)۔

استعفے کے بعد انہوں نے بھارت کی علاقائی ایئرلائن 'Fly91' (فلائی 91) میں بطور پائلٹ شمولیت اختیار کر لی ہے۔

گروپ کیپٹن ابھینندن (جو اس وقت ونگ کمانڈر کے عہدے پر فائز تھے) کو 27 فروری 2019 کو لائن آف کنٹرول (LoC) پر ہونے والی فضائی جھڑپ میں پاکستان کا F-16 طیارہ گرانے کا دعویٰ کرنے پر بھارت کا تیسرا سب سے بڑا فوجی اعزاز 'ویر چکر' دیا گیا تھا۔یہ فضائی معرکہ 14 فروری 2019 کو مقبوضہ کشمیر کے پلوامہ میں ہونے والے خودکش حملے (جس میں 40 سی آر پی ایف اہلکار ہلاک ہوئے تھے) کے ردعمل میں، 26 فروری کو بھارتی فضائیہ کے میراج-2000 طیاروں کی بالاکوٹ سٹرائیک کے اگلے ہی دن پیش آیا تھا۔ اسی جھڑپ کے دوران ابھینندن کا مگ-21 طیارہ بھی تباہ ہو گیا تھا اور وہ پاکستان کی حدود میں گرے تھے، جہاں سے بعد میں انہیں بھارت کے حوالے کر دیا گیا تھا۔