نئی دہلی : عامر خان نے سی جے پی احتجاج کے دوران سونم وانگچک سے کنارہ کرتے ہوئے کہا تھا کہ ان کی بلاک بسٹر ’3 ایڈیٹس‘ سائنس دان اور سماجی کارکن پر مبنی نہیں ہے۔ عامر خان نے ان دعوؤں کے ساتھ یہ بھی کہا تھا کہ وہ پہلے سے سونم وانگچک کو نہیں جانتے تھے۔ اب سماجی کارکن اور سائنس دان نے ان دعوؤں کو جھٹلاتے ہوئے اداکار کے خلاف ناراضگی کا اظہار کیا ہے۔ سونم وانگچک نے تازہ ترین پوڈکاسٹ میں عامر خان کے دعوؤں پر اپنا ردعمل دیا ہے۔

پرکھر گپتا کے پوڈکاسٹ پر سونم وانگچک نے عامر کے دعوؤں پر ردعمل دیتے ہوئے کہا کہ اداکار اپنی فلم ’گجنی‘ کے کردار میں کچھ زیادہ ہی ڈوب گئے تھے۔ سونم وانگچک کہتے ہیں کہ ’’کافی ویڈیوز سامنے آئے، جن میں وہ ’گجنی‘ والے آوٹ فٹ میں میری تقریر دیکھ رہے تھے۔ تو شاید وہ ’گجنی‘ والے آوٹ فٹ میں تھے، اس لیے شارٹ ٹرم میموری لاس ہو گیا ہوگا۔ 15 منٹ بعد بھول گئے ہوں گے، تو میں حیران نہیں ہوں۔ ورنہ ہم بہت تفصیل سے ملے تھے۔‘‘

سونم وانگچک مزید کہتے ہیں کہ ’’ہم نے سنا ہے کہ وہ اپنے کردار میں بہت زیادہ ڈوب جاتے ہیں۔ تو شاید ’گجنی‘ میں وہ اتنے ڈوب چکے تھے کہ جس ایوارڈ فنکشن میں وہ آئے تھے، جہاں میں ایوارڈ لے رہا تھا، وہ بھی بھول گئے ہوں گے۔‘‘ سونم وانگچک نے مزید بتایا کہ عامر خان کے ساتھ ان کی کئی تفصیلی بات چیت ہوئی تھی۔

سونم وانگچک کا دعویٰ، عامر خان سے ہوئی تھی طویل ملاقات
عامر خان کے دعوؤں پر بات کرتے ہوئے سونم وانگچک نے کہا کہ دونوں نے خیالات کا تبادلہ بھی کیا تھا۔ تاہم، انہوں نے یہ واضح کیا کہ وہ ’3 ایڈیٹس‘ کو اپنی زندگی پر مبنی فلم یا اپنی سوانح عمری نہیں کہیں گے۔ فلم کے ساتھ ان کا تعلق اثر اور تحریک کا ہے۔

سونم وانگچک کا ماننا ہے کہ عامر خان نے شاید انجانے میں ان کی گفتگو سے کچھ خیالات لیے ہوں گے اور انہیں پہلے سے موجود فلم کی اسکرپٹ میں شامل کیا ہوگا۔ ممکن ہے کہ فلم کے رائٹرز کو بھی ان خیالات کے اصل ماخذ کی معلومات نہ رہی ہوں۔