پرتگال کے عالمی شہرت یافتہ سابق فٹبالر کرسٹیانو رونالڈو نے کھیل کے میدان کے بعد شوبز کی دنیا میں بھی قدم رکھنے کا فیصلہ کر لیا۔
بین الاقوامی میڈیا کی رپورٹ کے مطابق کرسٹیانو رونالڈو معروف اسٹریمنگ پلیٹ فارم پیراماؤنٹ پلس کی نئی فٹبال سیریز میں اداکاری کرتے دکھائی دیں گے۔
رپورٹ میں بتایا گیا ہے کہ فٹبالر کی پہلی اسکرپٹڈ ٹی وی سیریز کا نام ’ڈے ونز (Day 1s) ہے، جس کی پروڈکشن شروع ہو چکی ہے۔
رپورٹ کے مطابق یہ 10 اقساط پر مشتمل ایک اسپورٹس کامیڈی سیریز ہو گی، جس میں فٹبال کی دنیا کے پس پردہ معاملات، دوستی، عزائم اور کامیابی کے سفر کو پیش کیا جائے گا۔
رپورٹ میں بتایا گیا ہے کہ اس سیریز میں ہالی ووڈ اداکار ڈیمین لیوس مرکزی کردار ادا کریں گے، جو اسٹینلے ڈالٹن نامی ایک بااثر فٹبال ایجنٹ کا کردار نبھائیں گے۔
رپورٹ کے مطابق کرسٹیانو رونالڈو کے علاوہ سابق فرانسیسی فٹبالر تھیری ہنری اور برطانوی ریپر ڈیو بھی اس سیریز کا حصّہ ہیں۔
رپورٹ میں بتایا گیا ہے کہ اس سیریز کی کہانی ایک نوجوان فٹبالر کے گرد گھومتی ہے جو انگلش پریمیئر لیگ کے کلب برینٹفورڈ میں کھیلنے کا خواب پورا کرتا ہے، اس دوران اس کے بچپن کے دوست بھی اس کے سفر میں اہم کردار ادا کرتے ہیں، جو شہرت اور دولت ملنے سے پہلے سے اس کے ساتھ ہوتے ہیں۔
رپورٹ کے مطابق کرسٹیانو رونالڈو اس سیریز میں اداکاری کرنے کے ساتھ ایگزیکٹیو پروڈیوسر کی ذمے داری بھی نبھائیں گے، وہ برطانوی فلم ساز میتھیو وان کے ساتھ مل کر قائم کردہ پروڈکشن کمپنی یو آر ماروو اسٹوڈیوز کے تحت اس منصوبے کا حصہ بنے ہیں۔
اس حوالے سے کرسٹیانو رونالڈو کا کہنا ہے کہ میں نے اپنی پوری زندگی فٹبال کو دی ہے اور میں جانتا ہوں کہ اس کھیل کی سب سے متاثر کن کہانیاں اکثر میدان سے باہر جنم لیتی ہیں۔
انہوں نے کہا کہ فٹبال صرف کھیل نہیں بلکہ خوابوں، عزائم، وفاداری اور قربانی کی داستان بھی ہے۔
فلم ’کنگز مین‘ کے ہدایت کار میتھیو وان نے سیریز کے پائلٹ ایپی سوڈ کی ہدایت کاری کی ہے، جبکہ ڈین مازر شو رنر کی ذمے داریاں سنبھالیں گے۔
پرتگال کے عالمی شہرت یافتہ سابق فٹبالر کرسٹیانو رونالڈو نے کھیل کے میدان کے بعد شوبز کی دنیا میں بھی قدم رکھنے کا فیصلہ کر لیا۔...
Source: Admin