نئی دہلی: برکس سربراہی اجلاس کے موقع پر غیر ملکی رہنماؤں کے لیے پیش کیے گئے مکمل سبزی خور عشائیے (ویجیٹیرین ڈنر) کا مینو اب سیاسی بحث کا موضوع بن گیا ہے۔ کانگریس کے لوک سبھا میں قائد حزب اختلاف راہل گاندھی نے اس معاملے پر مرکز کی نریندر مودی حکومت کو بالواسطہ طور پر نشانہ بناتے ہوئے کہا ہے کہ 80 فیصد ہندوستانی گوشت خور ہیں اور ہندوستانی غیر سبزی خور کھانے بھی انتہائی لذیذ ہوتے ہیں۔

راہل گاندھی نے اتوار کو ایکس پر پوسٹ کرتے ہوئے لکھا، ’’ریکارڈ کے لیے: 80 فیصد ہندوستانی نان ویجیٹیرین ہیں۔ ہندوستانی نان ویجیٹیرین کھانا مزیدار ہے۔ جیسا کہ میری بہن کے چھولے بھٹورے بھی ہیں۔‘‘ اس کے ساتھ انہوں نے چھولے بھٹورے کی تصویر بھی شیئر کی۔

راہل گاندھی کا یہ تبصرہ برکس سربراہی اجلاس کے دوران منعقدہ اس گالا ڈنر کے ایک دن بعد سامنے آیا، جس میں غیر ملکی رہنماؤں اور وفود کو مکمل سبزی خور ہندوستانی کھانا پیش کیا گیا تھا۔ مینو میں کھانڈوی میل فیوئی، کھمب گلاوٹی، پنیر لابابدار، گُچھی مارمک، کیرٹ بین پوریال، ملیٹ پلاؤ اور چقندر رائتہ شامل تھے، جبکہ میٹھے میں جلیبی کے ساتھ فروٹ کریم اور شاہتوت پھرنی پیش کی گئی۔

کانگریس کے ترجمان پون کھیڑا نے بھی اس معاملے کو حکومت کی غذائی پالیسی اور ہندوستان کی ثقافتی تنوع سے جوڑتے ہوئے سخت سوال اٹھائے۔ انہوں نے کہا کہ بی جے پی کی ہندوستانیوں پر اپنی غذائی پسند مسلط کرنے کی عادت پہلے ہی انتہائی تشویش ناک ہے، لیکن اب حکومت نے یہ قدم دنیا بھر سے آنے والے معزز مہمانوں تک بھی بڑھا دیا ہے۔


کھیڑا نے کہا کہ ہندوستان ایک امیر، متنوع اور کثیرالمطبخ ملک ہے، جہاں دنیا کے بہترین غیر سبزی خور پکوان بھی موجود ہیں اور انہیں دنیا بھر کے لوگ پسند کرتے ہیں۔ ان کے بقول سوال یہ ہے کہ مودی حکومت نے ہندوستان کی ثقافت کے اس پہلو کو چھپانے کا فیصلہ کیوں کیا؟ کیا حکومت کو ہندوستان کی وہ تنوع پسند نہیں جس نے ملک کی شناخت بنائی ہے؟

دوسری جانب مرکزی وزیر کیرن رجیجو نے کانگریس کے اعتراض کو مسترد کرتے ہوئے کہا کہ کھانے کے مینو پر بھی سیاست کی جا رہی ہے۔ ان کا کہنا تھا کہ غیر ملکی مہمانوں نے ہندوستانی سبزی خور کھانوں سے لطف اٹھایا اور یہ ملک کی مختلف علاقائی روایات، ذائقوں اور غذائی تنوع کی نمائندگی کرتے ہیں۔

اس سیاسی بحث کے درمیان راہل گاندھی نے اتوار کو ملائیشیا کے وزیر اعظم انور ابراہیم سے بھی نئی دہلی میں ملاقات کی۔ راہل گاندھی اور کانگریس کی رکن پارلیمنٹ پرینکا گاندھی واڈرا نے انور ابراہیم کے ساتھ ناشتے پر ملاقات کی، جس میں ہندوستان اور ملائیشیا کے باہمی تعلقات اور باہمی دلچسپی کے امور پر تبادلہ خیال ہوا۔ انور ابراہیم 18ویں برکس سربراہی اجلاس میں شرکت کے لیے ہندوستان میں موجود ہیں۔