مرکزی وزیر داخلہ امت شاہ نے اتوار کے روز بڑا بیان دیتے ہوئے کہا کہ ملک میں 2029 کے لوک سبھا انتخابات سے قبل 21 ریاستوں میں یکساں سول کوڈ (UCC) نافذ کر دیا جائے گا۔ اس کے ساتھ ہی انہوں نے وزیر اعظم نریندر مودی کی سالگرہ کے موقع پر 30 روزہ ’سیوا سنکلپ ابھیان‘ شروع کرنے کے منصوبے کا بھی اعلان کیا۔

ممبئی میں ’سیوا سنکلپ ابھیان‘ کے سلسلے میں میڈیا سے خطاب کرتے ہوئے امت شاہ نے کہا کہ ’’ہم نے کئی ریاستوں میں یکساں سول کوڈ (UCC) نافذ کیا ہے۔ مجھے یقین ہے کہ 2029 سے قبل بی جے پی کی قیادت والی این ڈی اے حکومت کے تحت آنے والی تمام 21 ریاستوں میں UCC نافذ کر دیا جائے گا۔‘‘
فی الحال بی جے پی کی قیادت والی این ڈی اے 19 ریاستوں اور دو مرکز کے زیر انتظام علاقوں میں اقتدار میں ہے، جن میں دہلی، مغربی بنگال، آسام، اتراکھنڈ، راجستھان، مہاراشٹر، بہار اور اتر پردیش شامل ہیں۔ اتراکھنڈ، گجرات اور آسام میں پہلے ہی UCC نافذ کیا جا چکا ہے، جبکہ مدھیہ پردیش نے UCC کا مسودہ تیار کرنے کے لیے ایک کمیٹی تشکیل دی ہے۔

امت شاہ نے یہ بھی اعلان کیا کہ پورا این ڈی اے اتحاد اور رضاکار تنظیمیں ملک بھر میں 17 ستمبر سے 17 اکتوبر تک ’’سیوا سنکلپ ابھیان‘‘ چلانے کے لیے متحد ہو رہی ہیں۔ یہ مہم نریندر مودی کے وزیر اعظم اور گجرات کے وزیر اعلیٰ کی حیثیت سے 25 سال مکمل ہونے کے موقع پر منعقد کی جائے گی۔