بالی ووڈ کے معروف فلمساز روہت شیٹی کے گھر فائرنگ اور رنویر سنگھ کو دھمکیاں دینے والے ہری باکسر کو گرفتار کرلیا گیا۔
بالی ووڈ شخصیات کو ملنے والی دھمکیوں اور ان کے گھروں پر حملوں کے واقعات نے ایک بار پھر ان کی سیکیورٹی کے حوالے سے شدید خدشات کو جنم دیا ہے۔ حالیہ برسوں میں کئی اداکاروں اور فلمسازوں کو بھتہ مانگنے یا دھمکیاں دینے کے پیغامات موصول ہوئے ہیں۔
اس دوران لارنس بشنوئی گینگ کے مبینہ کارندے اور گینگسٹر ہری باکسر کے حوالے سے ایک اہم پیشرفت سامنے آئی ہے، جس نے فلمی دنیا کو دھمکیاں دی تھیں۔
لارنس بشنوئی کا مبینہ قریبی ساتھی ہری چند جاٹ عرف ’ہری باکسر‘ امریکی حکام کی تحویل میں آ گیا ہے۔ دی ٹائمز آف انڈیا کی رپورٹس کے مطابق اسے 22 فروری کو کیلیفورنیا میں امریکی امیگریشن اینڈ کسٹمز انفورسمنٹ نے حراست میں لیا۔
ہری باکسر نے مبینہ طور پر ممبئی میں فلمساز روہت شیٹی کے گھر پر ہونے والے فائرنگ کے واقعے کی ذمہ داری قبول کی تھی۔ اس پر روہت شیٹی اور معروف اداکار رنویر سنگھ کو وائس نوٹ کے ذریعے جان سے مارنے کی دھمکیاں دینے اور 20 کروڑ روپے بھتہ مانگنے کا بھی الزام ہے۔
بالی ووڈ کے معروف فلمساز روہت شیٹی کے گھر فائرنگ اور رنویر سنگھ کو دھمکیاں دینے والے ہری باکسر کو گرفتار کرلیا گیا۔...
Source: Admin
