انٹرنیشنل فٹ بال فیڈریشن (فیفا) کے صدر جیانی انفانتینو نے اس بات کی تردید کی ہے کہ یورپی فٹ بال ایسوسی ایشن (یوئیفا) نے ایک ایسی خاتون ملازم کو رقم ادا کی تھی جس کے بارے میں دعویٰ کیا گیا تھا کہ براعظم کی باڈی کے سیکرٹری جنرل کے طور پر ان کے دورِ ملازمت کے دوران ان کے اس کے ساتھ تعلقات تھے۔ اخبار ڈیلی ’’ ٹیلی گراف ‘‘ نے خبر دی تھی کہ انفانتینو کے ساتھ مبینہ تعلقات کے بعد مذکورہ ملازمہ نے چھ ہندسوں پر مشتمل رقم حاصل کی تھی۔ ایک بیان میں یوئیفا نے اس خاتون ملازم کو رقم کی ادائیگی کے ساتھ ساتھ بزنس ایڈمنسٹریشن میں ماسٹرز کی ڈگری (ایم بی اے) حاصل کرنے کے لیے اس کی تعلیم کے اخراجات برداشت کرنے کی تصدیق کی اور نشاندہی کی کہ یہ ادائیگیاں اس وقت کے نافذ العمل ضوابط کے مطابق تھیں۔

یہ رپورٹ ایک ایسے وقت میں سامنے آئی ہے جب فیفا کے زیرِ اہتمام مردوں اور خواتین کے ورلڈ کپ سمیت دیگر مقابلوں کا انتظام سنبھالنے والی کمپنی میں نجی سرمایہ کاری حاصل کرنے کے ان کے منصوبے کے پس منظر میں انفانتینو پر دباؤ بڑھ رہا ہے۔

انفانتینو نے 16 سال تک یوئیفا میں کام کیا اور فروری 2016 میں فیفا کے صدر منتخب ہونے سے پہلے 2009 سے سیکرٹری جنرل کے عہدے پر فائز رہے۔ یوئیفا کے ایک ترجمان نے کہا کہ ہم ان الزامات سے واقف ہیں اور ہم اس بات کی تصدیق کر سکتے ہیں کہ متعلقہ فرد کو ملازمت کے خاتمے کے واجبات ادا کیے گئے تھے۔ اس کے ساتھ ہی ایک مقامی بزنس سکول سے ایم بی اے کی ڈگری حاصل کرنے کے لیے ایک کورس کی فیس بھی ادا کی گئی تھی۔

انہوں نے مزید کہا کہ یہ ادائیگیاں ان ضوابط کے مطابق تھیں جو اس وقت ملازمت چھوڑنے والے ملازمین کے لیے نافذ العمل تھے۔ انہوں نے مزید کہا 2016 سے ان ضوابط کو سخت کر دیا گیا ہے اور موجودہ ملازمین کے ضوابط جو یوئیفا کے تمام سطحوں کے تمام کارکنوں پر لاگو ہوتے ہیں ایک جدید اور ممتاز ادارے میں نافذ العمل ضوابط کی عکاسی کرتے ہیں۔

دوسری طرف فیفا کے ایک ترجمان نے اخبار "ٹیلی گراف" کو بتایا کہ فیفا کے صدر جیانی انفانتینو ان الزامات کی سختی سے تردید کرتے ہیں ۔ ان کا کہنا ہے کہ یہ بالکل بھی درست نہیں ہیں۔ انہوں نے مزید کہا کہ یوئیفا یا فیفا کے کسی ملازم نے کبھی بھی انفانتینو کے رویے کے بارے میں کوئی شکایت درج نہیں کرائی کیونکہ ایسا کوئی واقعہ پیش ہی نہیں آیا جس میں وہ ملوث ہوں۔ انہوں نے مزید کہا کہ ملازمین سے متعلق ادارے کے تمام اقدامات، بشمول ملازمت چھوڑنے پر واجبات یا سروس کے خاتمے کے الاؤنسز، تمام نافذ العمل ضوابط کے مطابق ہمیشہ مجاز ڈائریکٹرز کی منظوری سے کیے گئے ہیں۔

انفانتینو کو ورلڈ کپ کا انتظام سنبھالنے والی کمپنی میں نجی شعبے کے سرمایہ کاروں کو حصص بیچنے کے تنازع سے بھرپور منصوبے کی وجہ سے ایک ہفتے سے زائد عرصے سے دباؤ کا سامنا ہے۔ یوئیفا اور دو دیگر براعظمی کنفیڈریشنز نے اس منصوبے کو مسترد کر دیا ہے۔ بدھ کے روز مراکش میں ایک اجلاس کے بعد انفانتینو کو فیفا گورننگ کونسل کی حمایت حاصل ہو گئی اور انہوں نے اس عمل کو جس انداز میں چلایا گیا اس پر معذرت بھی پیش کی۔ تاہم جب تک اس منصوبے کو ترک نہیں کر دیا جاتا یوئیفا کے 55 رکن ممالک کی جانب سے فیفا کے مقابلوں کا بائیکاٹ کرنے کی دھمکی برقرار ہے کیونکہ یورپی ایسوسی ایشن نے جمعرات کے روز اس بات کی تصدیق کی کہ بدھ کے اعلان سے کچھ بھی نہیں بدلا ہے۔

Source: Admin