ہندستانی کرکٹ ٹیم میں واپسی کے لیے جدوجہد کرنے والے تیز گیند باز محمد شامی ان دنوں سرخیوں میں ہیں۔ اس بار شامی میدان میں اپنی دھماکہ خیز گیند بازی کے لیے نہیں بلکہ میدان سے باہر ملاقات کے لیے خبروں میں ہیں۔ درحقیقت، شامی نے دہلی میں راشٹریہ لوک دل(آر ایل ڈی)کے سربراہ جینت چودھری سے ملاقات کی۔ اس ملاقات کے بعد یہ خبریں گردش کرنے لگیں کہ محمد شامی سیاست میں آنے پر غور کر رہے ہیں۔ذرائع ابلاغ میں یہ دعوے گردش کرنے لگا کہ محمد شامی امروہہ سے راشٹریہ لوک دل کے ٹکٹ پر اسمبلی الیکشن لڑ سکتے ہیں۔

ذرائع کے مطابق محمد شامی کے بارے میں یہ تمام دعوے محض افواہیں اور قیاس آرائیاں ہیں۔ شامی نے ابھی تک یہ فیصلہ نہیں کیا ہے کہ وہ سیاست میں اتریں گے یا یوپی اسمبلی الیکشن لڑیں گے۔ ذرائع نے انکشاف کیا ہے کہ یہ تمام دعوے سراسر غلط ہیں۔ تاہم اس معاملے پر شامی یا آر ایل ڈی کی طرف سے ابھی تک کوئی ردعمل سامنے نہیں آیا ہے۔ کئی اسپورٹس صحافیوں نے بھی شامی کے الیکشن لڑنے کی افواہوں کو محض افواہ قرار دیا ہے۔

محمد شامی آخری بار مارچ 2025 میں ہندوستان کے لیے کھیلے تھے۔ وہ 2025 کی چیمپئنز ٹرافی میں کھیلے تھے۔ تب سے وہ ٹیم انڈیا سے باہر ہیں۔ 36 سالہ محمد شامی اس وقت گھریلو کرکٹ کھیل رہے ہیں اور ہندوستانی ٹیم میں واپسی کی کوشش کر رہے ہیں۔ شامی نے ہندوستان کے لیے 64 ٹیسٹ، 108 ون ڈے اور 25 ٹی 20 انٹرنیشنل کھیلے ہیں۔ ان کے پاس ٹیسٹ میں 229، ون ڈے میں 206 اور ٹی ٹوئنٹی انٹرنیشنل میں 27 وکٹیں ہیں۔ شامی نے آئی پی ایل میں اب تک 132 میچ کھیلے ہیں جس میں 145 وکٹیں حاصل کی ہیں۔ وہ فی الحال آئی پی ایل میں لکھنؤ سپر جائنٹس کے رکن ہیں۔