نئی دہلی، 11 جون: ریلوے کے سفر کے لیے تتکال ٹکٹ کے منصفانہ اور شفاف حصول کو یقینی بنانے اور حقیقی مسافروں کے مفادات کے تحفظ کے مقصد سے محکمہ ریلوے نے تتکال ٹکٹ بکنگ سسٹم میں اہم تبدیلیوں کا اعلان کیا ہے ۔ ان تبدیلیوں کا مقصد مسافروں کی تصدیق اور اسکیم کے غلط استعمال کو روکنا ہے ۔ یکم جولائی 2025 سے آئی آر سی ٹی سی کی آفیشل ویب سائٹ اور موبائل ایپ کے ذریعے تتکال ٹکٹ صرف ان صارفین کے لیے دستیاب ہوں گے جن کی تصدیق آدھار سے ہو۔مزید برآں، 15 جولائی 2025 سے آن لائن تتکال بکنگ کے لیے آدھار پر مبنی او ٹی پی کی فراہمی لازمی ہو گی۔پیسنجر ریزرویشن سسٹم (پی آر ایس) کاو نٹرز اور منظور شدہ ایجنٹوں کے ذریعے تتکال ٹکٹوں کے لیے بکنگ کے وقت صارف کے فراہم کردہ موبائل نمبر پر بھیجے گئے او ٹی پی کی تصدیق درکار ہوگی۔ بلک (کثیر) بکنگ کو روکنے کے لیے ہندوستانی ریلوے کے منظور شدہ ایجنٹوں کو بکنگ ونڈو کے پہلے 30 منٹ کے دوران تتکال ٹکٹ بک کرنے کی اجازت نہیں ہوگی۔اے سی کلاسز کے لیے یہ پابندی صبح 10:00 بجے سے صبح 10:30 بجے تک اور نان اے سی کلاسز کے لیے صبح 11:00 بجے سے صبح 11:30 بجے تک نافذ عائد ہوگی۔سی آر آئی ایس اور آئی آر سی ٹی سی کو ہدایت دی گئی ہے کہ وہ نظام میں ضروری ترمیم کریں اور اس کے مطابق تمام زونل ریلوے اور متعلقہ محکموں کو مطلع کریں۔وزارت ریلوے نے تمام مسافروں سے اپیل کی ہے کہ وہ ان تبدیلیوں کو نوٹ کریں اور پریشانی سے بچنے کے لیے اپنے آئی آر سی ٹی سی صارف پروفائل کے ساتھ آدھار کو لازمی طور پر لنک کریں۔

Source: uni news