نئی دہلی 12 جون : اشیائے خوردونوش کی قیمتوں میں کمی کی وجہ سے صارفین کی قیمتوں کے اشاریہ پر مبنی خوردہ افراط زر اس سال مئی میں 2.82 فیصد کی چھ سال کی کم ترین سطح پر آ گیا، جبکہ اس سال اپریل میں یہ 3.16 فیصد اور مئی 2024 میں 4.8 فیصد تھی،مئی 2019 میں یہ 3.05 فیصد رہی تھی۔ جمعرات کو جاری ہونے والے سرکاری اعداد و شمار کے مطابق مہنگائی کے محاذ پر عام لوگوں کے لیے ریلیف کی خبر ہے ۔ سبزیوں اور پھلوں کی قیمتوں میں نرمی کے باعث خوردہ مہنگائی چھ سال کی کم ترین سطح پر آگئی ہے ۔ مئی کے مہینے میں خوردہ مہنگائی 2.82 فیصد پر آگئی۔ قومی شماریاتی دفتر (این ایس او) کے جاری کردہ اعداد و شمار کے مطابق مئی 2025 میں خوراک کی افراط زر کی شرح 0.99 فیصد رہی جو ایک سال پہلے کے اسی مہینے میں 8.69 فیصد سے بہت کم ہے ۔ مئی 2025 کی غذائی مہنگائی کا یہ اعداد و شمار اکتوبر 2021 کے بعد سب سے کم ہے ۔ این ایس او نے بیان میں کہا کہ مئی 2025 میں بنیادی مہنگائی اور غذائی افراط زر میں کمی کی بنیادی وجہ دالوں اور اس کی مصنوعات، سبزیوں، پھلوں، اناج اور اس کی مصنوعات، گھریلو سامان اور خدمات، چینی اور کنفیکشنری اور انڈے کی قیمتوں میں کمی اور سازگار بنیادی اثر ہے ۔ دیہی مہنگائی مئی میں 2.59 فیصد رہی جو کہ اپریل میں 2.92 فیصد تھی۔ مئی 2025 میں شہری مہنگائی 3.07 فیصد رہی جو کہ اپریل 2025 میں 3.36 فیصد تھی۔ دیہی اشیائے خوردونوش کی افراط زر 0.95 فیصد اور شہری خوراک کی افراط زر 0.96 فیصد رہی۔

Source: uni news