لدھیانہ، 23 جون : پنجاب میں لدھیانہ مغربی اسمبلی ضمنی انتخاب کے لیے ووٹوں کی گنتی پیر کی صبح 8 بجے شروع ہوئی۔ ضمنی انتخاب 19 جون کو ہوا تھا۔ گنتی کا عمل 14 راؤنڈز پر مشتمل ہوگا۔ گنتی خالصہ کالج فار ویمن میں سخت سیکورٹی کے درمیان ہو رہی ہے۔ یہ سیٹ جنوری میں عام آدمی پارٹی (اے اے پی) کے ایم ایل اے گرپریت بسی گوگی کی موت کے بعد خالی ہوئی تھی۔ الیکشن میں 14 امیدواروں نے مقابلہ کیا اور 51.33 فیصد پولنگ ریکارڈ کی گئی۔ گنتی کے دو راؤنڈ کے بعد، اے اے پی امیدوار سنجیو اروڑا اپنے قریبی حریف کانگریس امیدوار بھارت بھوشن آشو پر 2482 ووٹوں سے آگے تھے۔ ضمنی انتخاب میں حصہ لینے والی اہم سیاسی جماعتیں عام آدمی پارٹی، کانگریس، بھارتیہ جنتا پارٹی (بی جے پی) اور شرومنی اکالی دل تھیں۔ اے اے پی نے 61 سالہ راجیہ سبھا ممبر اور لدھیانہ میں مقیم صنعت کار سنجیو اروڑہ کو نامزد کیا جو اپنے سماجی بہبود کے کاموں کے لیے جانے جاتے ہیں۔ کانگریس پارٹی نے 51 سالہ بھارت بھوشن آشو، سابق وزیر اور پنجاب کانگریس کے ورکنگ صدر کو اپنا امیدوار نامزد کیا۔ بی جے پی کے امیدوار سینئر لیڈر جیون گپتا تھے۔ مسٹر گپتا پارٹی کی پنجاب یونٹ کی کور کمیٹی کے رکن ہیں۔ شرومنی اکالی دل نے لدھیانہ بار ایسوسی ایشن کے سابق صدر اور وکیل پروپکر سنگھ گھمن کو اپنا نمائندہ منتخب کیا۔

Source: uni urdu news service