بھونیشور، 12 جون:) اوڈیشہ میں بھدرک ضلع انتظامیہ نے چند دن پہلے فرقہ وارانہ تصادم میں زخمی ہونے والے ایک شخص کی موت کے بعد امن و قانون کے بگڑنے کے اندیشہ کے پیش نظر جمعرات کی صبح 6 بجے سے انٹرنیٹ خدمات کو 24 گھنٹے کے لیے معطل کر دیا ہے ۔انتظامیہ نے کہا کہ امن عامہ کو برقرار رکھنے کے لیے احتیاطی تدابیر کے طور پر، بھدرک میونسپلٹی، بھدرک بلاک، تہڈی بلاک، دھام نگر بلاک اور دھام نگر نوٹیفائیڈ ایریا کونسل (این اے سی) سمیت حساس علاقوں میں انٹرنیٹ خدمات آج صبح 6 بجے سے جمعہ کی صبح 6 بجے تک معطل رہیں گی۔ خیال ر ہے کہ تہڈی کے کاستی گا¶ں کے رہنے والے سنتوش پریدا 30 مئی کو فرقہ وارانہ فسادات کے دوران شدید زخمی ہو گئے تھے اور بدھ کو ایک نجی اسپتال میں زخموں کی تاب نہ لاتے ہوئے دم توڑ گئے ۔ وزیر اعلیٰ موہن چرن ماجھی پہلے ہی پریدا کے کنبہ کو 10 لاکھ روپے کی ایکس گریشیا اور کنبہ کے ایک فرد کو ملازمت دینے کا اعلان کر چکے ہیں۔ واقعہ پر گہری تشویش کا اظہار کرتے ہوئے مسٹر ماجھی نے یقین دلایا کہ قصورواروں کے خلاف سخت کارروائی کی جائے گی اور متاثرہ کنبہ کو انصاف ملے گا۔ اوڈیشہ حکومت نے متاثرہ علاقوں میں پولیس کے 27 دستے تعینات کیے ہیں۔ واقعے کے سلسلے میں اب تک مرکزی ملزم سمیت 12 افراد کو گرفتار کیا جا چکا ہے ۔ امن و قانون کو خراب ہونے سے روکنے کے لیے امن کمیٹی کے اجلاس منعقد کرنے کی کوششیں بھی جاری ہیں جن میں دونوں برادریوں کے رہنما شامل ہیں۔ بھدرک کے سپرنٹنڈنٹ آف پولیس (ایس پی) منوج را¶ت نے تصدیق کی کہ سنتوش پریدا کی موت کے بعد انٹرنیٹ پر پابندی لگا دی گئی ہے ۔ انہوں نے کہا کہ اس معاملے میں کئی چھاپے مارے گئے ہیں اور اب تک 12 گرفتاریاں کی جا چکی ہیں۔

Source: uni news