بنگلورو، 13 جون :کرناٹک میں جنوب مغربی مانسون کے زور پکڑتے ہی ہندستان کے محکمہ موسمیات (آئی ایم ڈی) نے جمعہ کو ریاست میں موسلادھار بارش کے پیش نظر نو اضلاع کے لیے ریڈ الرٹ جاری کیا۔ ریاست میں مسلسل بارش کے بعد ہبلی دھارواڑ میں دو لوگوں کی موت ہو گئی ہے۔ دھارواڑ ضلع میں بدھ کو ایک شخص کی موت اس وقت ہوئی جب اس کا ٹریکٹر کنڈگول تعلقہ کے ہنچینال گاؤں کے قریب نالے میں پلٹ گیا۔ اس کی شناخت 31 سالہ کسان شیوایا بسایا وتنلمتھ کے طور پر کی گئی ہے۔ ایک اور واقعہ میں ہبلی کے نیکر نگر میں ایک شخص اپنی دو پہیہ گاڑی سمیت بہہ جانے والے نالے میں بہہ گیا۔ تاہم اس کے ساتھ بیٹھے شخص کو راہگیروں نے بچا لیا۔ متوفی کی شناخت حسین صاب کلاسا (58) کے طور پر کی گئی ہے۔ آئی ایم ڈی نے لگاتار بارش کے پیش نجر اترا کنڑ، اڈوپی، دکشن کنڑ، بیلگاوی، دھارواڑ، گدگ، چکمگلورو، کوڈاگو اور شیواموگا میں ریڈ الرٹ جاری کیا ہے۔ یہ الرٹ انتہائی شدید بارشوں کا انتباہ ہے جس سے جان و مال کو شدید خطرہ لاحق ہو سکتا ہے۔ احتیاط کے طور پر اُڈپی اور کوڈاگو اضلاع میں اسکولوں اور آنگن واڑیوں کو بند کر دیا گیا ہے۔

Source: uni urdu news service