Sports

انگلینڈ کرکٹ کے نئے دور کا آغاز، جو روٹ کو بنایا گیا کپتان اور اسٹیفن فلیمنگ بنے ہیڈ کوچ

30/07/26

تجربہ کار بلے باز جو روٹ کی انگلینڈ کے ٹیسٹ کپتان کے طور پر واپسی ہوئی ہے۔ جو روٹ کو دوبارہ انگلینڈ کا ٹیسٹ کپتان مقرر کیا گیا ہے جو کہ اس کردار میں ان کا دوسرا دور ہے، جب کہ نیوزی لینڈ کے سابق کپتان اسٹیفن فلیمنگ کو ٹیم کا نیا ہیڈ کوچ نامزد کیا گیا ہے۔ یہ تقرریاں اس ماہ کے شروع میں برینڈن میک کولم کی کوچ کے عہدے سے برطرفی اور بین اسٹوکس کی بین الاقوامی کرکٹ سے ریٹائرمنٹ کے بعد انگلینڈ کے ٹیسٹ سیٹ اپ میں بڑے پیمانے پر ردوبدل کے بعد ہوئی ہیں۔ ٹیسٹ کرکٹ کی تاریخ میں دوسرے سب سے زیادہ رنز بنانے والے جو روٹ نے اس سے قبل اسٹوکس کو قیادت سونپنے سے پہلے 2017 سے 2022 تک انگلینڈ کی کپتانی کی تھی۔ جون میں نیوزی لینڈ کے ہاتھوں انگلینڈ کی 2-1 کی سیریز میں شکست کے بعد اسٹوکس کے الگ ہونے کے بعد 35 سالہ جوروٹ دوبارہ کپتان بنائے گئے ہیں۔ ریکارڈ 65 ٹیسٹ میں انگلینڈ کی قیادت کرنے کے بعد، روٹ نے حال ہی میں نیوزی لینڈ کے خلاف دوسرے ٹیسٹ کے دوران اسٹینڈ ان کپتان کی ذمہ داری نبھائی تھی۔ وہ اگلے مہینے پاکستان کے خلاف تین میچوں کی ٹیسٹ سیریز کے ساتھ اپنے دوسرے دور کا آغاز کریں گے اور اس سے کے بعد وہ آسٹریلیا کے خلاف اگلی موسم گرما میں ہوم ایشز سیریز میں انگلینڈ کی قیادت کریں گے۔ 53 سالہ فلیمنگ نے نیوزی لینڈ کے اپنے سابق ساتھی میک کولم کی جگہ سنبھالی، جنہیں نیوزی لینڈ کی سیریز میں شکست کے بعد ان کی ٹیسٹ کوچنگ کی ذمہ داریوں سے فارغ کر دیا گیا تھا لیکن وہ انگلینڈ کے وائٹ بال کوچ کے طور پر خدماری جاری رکھیں گے۔

Source: Admin