واشنگٹن: اسرائیلی وزیراعظم بنیامین نیتن یاہو نے دعویٰ کیا ہے کہ اگر انہیں بیرون ملک حراست میں لینے کی کوئی کوشش کی گئی تو ان کے پاس اس صورتحال سے نمٹنے کے لیے خصوصی دستے تیار موجود ہیں۔ وائٹ ہاؤس میں امریکی صدر سے ملاقات کے بعد ایک امریکی ٹی وی چینل کو انٹرویو دیتے ہوئے نیتن یاہو نے واضح کیا کہ وہ آئندہ ستمبر میں اقوام متحدہ کی جنرل اسمبلی کے اجلاس میں شرکت کے لیے نیویارک ضرور جائیں گے اور ان کا یہ دورہ منسوخ کرنے کا کوئی ارادہ نہیں ہے۔ انہوں نے کہا کہ اگر انہیں گرفتار کرنے کی کوشش کی گئی تو ان کے گرد خصوصی دستے موجود ہوں گے، تاہم انہوں نے یہ وضاحت نہیں کی کہ یہ دستے کیا کردار ادا کریں گے۔ نیتن یاہو کا یہ بیان ایسے وقت میں سامنے آیا ہے جب نیویارک کے میئر ظہران ممدانی ان کی گرفتاری کا مطالبہ کر رہے ہیں اور بین الاقوامی فوجداری عدالت (آئی سی سی) کی جانب سے جاری کردہ وارنٹ کا ذکر کیا جا رہا ہے۔ اس حوالے سے دی اکانومسٹ اور یوگوو کے ایک حالیہ سروے میں 49 فیصد امریکی بالغ افراد کا خیال تھا کہ نیتن یاہو کو نیویارک آمد پر گرفتار کیا جانا چاہیے جبکہ 27 فیصد نے اس کی مخالفت کی۔ اسرائیلی وزیراعظم نے میئر ظہران ممدانی پر یہودیوں کے خلاف نفرت کو ہوا دینے کا الزام لگایا اور آئی سی سی کے گرفتاری وارنٹ کو مسترد کرتے ہوئے عدالت کو بدعنوان اور برائی پر مبنی ادارہ قرار دیا۔ انہوں نے خبردار کیا کہ اس عدالت کی کارروائیاں مستقبل میں امریکی حکام اور فوجیوں کے خلاف بھی استعمال کی جا سکتی ہیں۔ علاقائی امور پر بات کرتے ہوئے نیتن یاہو نے ایران کو متنبہ کیا کہ اگر اس نے اسرائیل پر حملہ کیا تو اسے زبردست طاقت کا سامنا کرنا پڑے گا، جبکہ انہوں نے یہ بھی کہا کہ اسرائیل معاہدہ ابراہیمی کو سعودی عرب تک وسعت دینے پر خوش ہوگا۔

Source: Admin