کلکتہ:میزبان بھارت 3 اکتوبر کو کلکتہ کے سالٹ لیک اسٹیڈیم میں برازیل کی قومی فٹبال ٹیم کی میزبانی کرے گا۔ برازیلین فٹبال کنفیڈریشن نے اس بین الاقوامی فرینڈلی میچ کی تصدیق کر دی ہے، جو بھارتی سرزمین پر 'سیلیساو¿' (برازیل ٹیم) کا پہلا تاریخی میچ ہوگا۔ اس اعلان کے ساتھ ہی برازیل کے دورہ بھارت کے حوالوں سے جاری تمام قیاس آرائیوں کا خاتمہ ہو گیا ہے۔ اس سے قبل 'ای ایس پی این برازیل' کی رپورٹس میں بتایا گیا تھا کہ سی بی ایف کلکتہ میں فرینڈلی میچ کی میزبانی کے لیے بات چیت کر رہا ہے، اگرچہ اس وقت حریف ٹیم کا حتمی فیصلہ نہیں ہوا تھا۔ اطلاعات کے مطابق سی بی ایف اور بھارتی حکام کے درمیان یہ بات چیت فیفا ورلڈ کپ کے دوران شروع ہوئی تھی۔ بھارت میں برازیلی ٹیم کے لیے شائقین کی دیوانگی، دیواروں پر بنے فن پارے اور مداحوں کے جوش و خروش کی ویڈیو سوشل میڈیا پر وائرل ہونے کے بعد برازیل نے بھارت میں کھیلنے میں گہری دلچسپی دکھائی تھی۔ برازیلین فٹبال کنفیڈریشن نے اپنے ایک رسمی بیان میں کہا کہ"برازیل کی قومی ٹیم کا شیڈول جاری ہے۔ آسٹریلیا میں فرینڈلی میچز کے بعد ہماری اگلی منزل بھارت ہوگی، جہاں ہم اپنی تاریخ کا ایک نیا اور بے مثال باب رقم کرنے جا رہے ہیں۔ 3 اکتوبر کو قومی ٹیم بھارتی سرزمین پر پہلی بار کلکتہ کے سالٹ لیک اسٹیڈیم میں میدان میں اترے گی۔ یہ اس ملک کے ساتھ ایک خاص ملاقات ہوگی جو برازیلی فٹبال ٹیم کے سب سے بڑے بین الاقوامی شائقین کا مسکن ہے اور جو نسل در نسل برازیلی فٹبال کی تاریخ کو بے پناہ محبت اور جذبے سے دیکھتا آیا ہے۔ ہم بھارتی مداحوں کے ساتھ اس لمحے کو جینے کے لیے بے تاب ہیں! کولکاتا میں ملاقات ہوگی۔" برازیل کی ٹیم آسٹریلیا میں پہلے سے طے شدہ دو فرینڈلی میچز کھیلنے کے بعد بھارت پہنچے گی، جہاں اس کے میچز 25 ستمبر کو ٹاو¿نزول اور 29 ستمبر کو برسبین میں شیڈول ہیں۔ کلکتہ کا برازیلی فٹبال کے ساتھ تعلق کئی دہائیوں پر محیط ہے۔ ورلڈ کپ کے دوران، یہ شہر ایک بار پھر پیلے اور سبز رنگ میں رنگ جاتا ہے اور مداح برازیلی پرچموں، مرلز اور کھلاڑیوں کے دیوقامت کٹ آو¿ٹس سے اپنے علاقوں کو سجا کر پانچ بار کی عالمی چیمپئن ٹیم کی حمایت کرتے ہیں۔ یہ رشتہ 1977ء میں اس وقت قائم ہوا تھا جب فٹبال کے عظیم کھلاڑی پیلے 'نیویارک کاسموس' کے ساتھ موہن بگان کے خلاف میچ کھیلنے کو کلکتہ آئے تھے، جو بھارتی فٹبال کی تاریخ کا ایک یادگار لمحہ قرار دیا جاتا ہے۔ تاہم، 3 اکتوبر کا یہ میچ اپنی نوعیت کا الگ اور تاریخی لمحہ ہوگا۔ یہ پہلا موقع ہوگا جب برازیل کی سینئر مردوں کی قومی ٹیم بھارت میں کھیلے گی، جس سے بھارتی ٹیم (بلیو ٹائیگرز) کو بین الاقوامی فٹبال کی سب سے کامیاب ٹیموں میں سے ایک کے خلاف اپنی صلاحیتوں کو آزمانے کا نادر موقع ملے گا۔ برازیل کی ٹیم فیفا ورلڈ کپ کے راو¿نڈ آف 16 سے باہر ہونے کی مایوس کن مہم کے بعد اس میچ میں اترے گی۔ ورلڈ کپ میں وینیسیئس جونیئرکی شاندار کارکردگی—جس میں انہوں نے چار گول اور ایک اسسٹ کیا—کے باوجود ناروے نے پانچ بار کی عالمی چیمپئن برازیل کو ٹورنامنٹ سے باہر کر دیا تھا۔

Source: Admin