کوچی، 9 اگست :) راشٹریہ سویم سیوک سنگھ کے سنگھ وچارک ٹی جی موہن داس کو دہلی میں احتجاج کر رہے طلباءپر فائرنگ کی وکالت کرنے کی پاداش میں اتوار کو متانچیری میں ان کی رہائش گاہ سے حراست میں لے لیا گیا۔
تیروواننت پورم سٹی سائبر کرائم پولیس کی ایک ٹیم نے مسٹر موہن داس کی رہائش گاہ پہنچ کر تلاشی لی، جس کے بعد انہیں حراست میں لے لیا گیا۔ دہلی کے جنتر منتر پر نیٹ پیپر لیک کے خلاف احتجاج کر رہے طلباءپر اشتعال انگیز تبصرہ کرنے کے بعد مسٹر موہن داس کے خلاف تیروواننت پورم سائبر پولیس نے معاملہ درج کیا تھا۔ انہوں نے ایک یوٹیوب چینل پر جاری ویڈیو میں کہا تھا کہ اگر انہیں موقع ملتا تو وہ احتجاج میں حصہ لے رہے لوگوں کو گولی مار دیتے ۔ انہوں نے یہ بھی کہا کہ جنتر منتر کے چار کلومیٹر کے دائرے میں کرفیو نافذ کر دینا چاہیے اور مظاہرین کو تین انتباہ دینے کے بعد پولیس اہلکاروں کو فائرنگ شروع کر دینی چاہیے ۔
مسٹر موہن داس نے کہا کہ کچھ مظاہرین بھاگ جاتے ، جبکہ کچھ مارے جاتے اور کچھ معذور ہو جاتے ۔ اس کے بعد چار گھنٹے کے اندر اندر صورتحال پرامن ہو جاتی۔ انہوں نے لاشوں کو اکٹھا کر کے اسپتال لے جانے کی بات بھی کہی تھی۔ ایک اور ویڈیو میں انہوں نے احتجاج میں حصہ لینے والی خواتین پر نازیبا تبصرے بھی کیے تھے ۔
تیروواننت پورم سائبر پولیس نے ان کے خلاف آئی شکایتوں کے بعد 29 جولائی کو معاملہ درج کیا تھا۔ اس معاملے میں بھارتیہ نیائے سنہیتا کی فساد بھڑکانے اور سماجی بدامنی پھیلانے سے متعلق دفعات لگائی گئیں۔ اس کے علاوہ انفارمیشن ٹیکنالوجی ایکٹ اور کیرالہ پولیس ایکٹ کی دفعات بھی لگائی گئیں۔ شکایت کنندگان میں آل انڈیا یوتھ فیڈریشن کے ٹی ٹی جسمن بھی شامل تھے ۔ کئی شکایت کنندگان نے معاملہ درج کرنے میں پولیس کی جانب سے ہوئی تاخیر پر بھی اعتراض ظاہر کیا اور اس دوران مسلسل شکایتوں کی تعداد بڑھتی گئی۔ ان کے تبصروں کی ویڈیو اب بھی یوٹیوب پر موجود ہے ۔
اس درمیان، سنگھ نے مسٹر موہن داس کے تبصرے سے کنارہ کشی اختیار کر لی ہے ۔ سنگھ کے جنوبی کیرالم پرانت سہ کاریہ واہ کے بی سری کمار نے کہا کہ حالیہ احتجاج پر مسٹر موہن داس کا تبصرہ ان کے ذاتی خیالات ہیں۔ انہوں نے کہا کہ وہ کسی بھی سطح پر سنگھ سے جڑے ہوئے نہیں ہیں۔ سنگھ ان کے بیان سے اتفاق نہیں رکھتا اور ایسے خیالات کی مذمت پرزور طریقے سے کی جانی چاہیے ۔

Source: Admin