جے پور، 15 نومبر (یو این آئی ) راجستھان ہائی کورٹ نے ازدواجی تنازعات میں جہیز کے لیے ہراساں کرنے کے معاملات پر اہم تبصرہ کرتے ہوئے کہا ہے کہ شوہر اور بیوی کے درمیان ہونے والے ہر جھگڑے ، باہمی اختلاف اور معمولی نوک جھونک کو مجرمانہ ظلم قرار نہیں دیا جا سکتا۔
عدالت نے واضح کیا کہ تعزیرات ہند کی دفعہ 498 اے کا استعمال ہر ازدواجی تنازعے میں بغیر سوچے سمجھے نہیں کیا جا سکتا۔ اسی تبصرے کے ساتھ ہائی کورٹ نے شوہر کے خلاف درج تقریباً 11 سال پرانی ایف آئی آر منسوخ کردی۔جسٹس اشوک کمار جین کی یک رکنی بنچ نے راہل بڈیا ل کی جانب سے دائر عرضی منظور کرتے ہوئے یہ حکم دیا۔
یہ معاملہ 2 دسمبر 2015 کو جے پور کے خواتین پولیس اسٹیشن میں درج ایف آئی آر سے متعلق تھا۔ اس میں شوہر اور اس کے اہل خانہ کے خلاف جہیز کے لیے ہراساں کرنے ، قتل کی کوشش، دھوکہ دہی، مارپیٹ، دھمکی دینے اور مجرمانہ سازش سمیت مختلف دفعات کے تحت الزامات عائد کیے گئے تھے ۔
عرضی گزار کی جانب سے سینئر وکیل راجیو سورانا نے وکیل مسکان ورما، امنگ جین، سومیا منگل اور پلک سنہا کے ساتھ مقدمے کی پیروی کرتے ہوئے دلیل دی کہ ایف آئی آر میں لگائے گئے الزامات عام نوعیت کے اور غیر واضح ہیں۔ شوہر کی جانب سے بیوی کے علاج، خاندانی ذمہ داریاں نبھانے اور بچے کی پرورش پر خرچ کرنے سے متعلق دستاویزات بھی عدالت میں پیش کیے گئے ۔
دوسری جانب ریاستی حکومت کی رپورٹ میں بتایا گیا کہ تفتیش کے دوران شوہر کے خلاف دفعہ 498 اے اور 406 کے تحت جرائم ثابت ہوئے تھے اور 10 جون 2022 کو الزامات بھی طے کردیے گئے تھے ۔
دونوں فریقوں کی بات سننے کے بعد ہائی کورٹ نے پایا کہ ایف آئی آر میں لگائے گئے الزامات شوہر اور بیوی کے درمیان ازدواجی تنازعے اور باہمی اختلافات کو ظاہر کرتے ہیں۔ عدالت نے کہا کہ ریکارڈ پر ایسا کوئی معاون ثبوت یا صورت حال سامنے نہیں آئی جس سے جہیز کے مطالبے کی تصدیق ہوتی ہو۔ ایسی صورت حال میں مجرمانہ کارروائی جاری رکھنا قانون کے عمل کا غلط استعمال ہے ۔
عدالت نے سپریم کورٹ کے سابقہ فیصلوں کا حوالہ دیتے ہوئے کہا کہ عام ازدواجی اختلافات اور چھوٹی موٹی بحث و تکرار کو دفعہ 498 اے کے تحت جرم قرار نہیں دیا جا سکتا۔
جے پور، 15 نومبر (یو این آئی ) راجستھان ہائی کورٹ نے ازدواجی تنازعات میں جہیز کے لیے ہراساں کرنے کے معاملات پر اہم تبصرہ کرتے ہوئے کہا ہے کہ شوہر اور بیوی کے درمیان ہونے والے ہر جھ...
Source: Admin
