عراقی وزیراعظم علی الزیدی نے سعودی ولی عہد شہزادہ محمد بن سلمان سے ریاض میں ملاقات کی ہے۔

عراق کے وزیراعظم علی الزیدی نے سعودی عرب کے دارالحکومت ریاض کے کنگ خالد انٹرنیشنل ایئرپورٹ سمیت دیگر مقامات پر حالیہ حملوں کی شدید مذمت کرتے ہوئے یقین دہانی کروائی ہے کہ بغداد اپنی سرزمین سعودی عرب کی سلامتی کے لیے خطرہ بننے والی سرگرمیوں یا حملوں کے لیے استعمال نہیں ہونے دے گا۔

علی الزیدی نے سعودی عرب میں شہری تنصیبات اور اہم بنیادی ڈھانچے کو نشانہ بنانے والے حملوں کی مذمت کرتے ہوئے انہیں علاقائی سلامتی اور استحکام کے لیے خطرہ قرار دیا۔

انہوں نے واضح کیا کہ عراقی حکومت اپنی سرزمین کو سعودی عرب یا خطے کے دیگر ممالک کے خلاف حملوں اور نقصان دہ سرگرمیوں کے لیے استعمال کرنے کی اجازت نہیں دے گی۔

ان کا کہنا تھا کہ بغداد ہمسایہ ممالک کے ساتھ اچھے تعلقات برقرار رکھنے اور سعودی عرب سمیت تمام ممالک کی خودمختاری کے احترام کے لیے پُرعزم ہے۔

ملاقات کے دوران شہزادہ محمد بن سلمان نے بھی مختلف شعبوں، بالخصوص سیکیورٹی تعاون اور رابطہ کاری میں عراق کے ساتھ تعلقات مزید مضبوط بنانے کے لیے سعودی عرب کے عزم کا اعادہ کیا۔

سعودی ولی عہد شہزادہ محمد بن سلمان نے خطے میں استحکام کے لیے عراقی حکومت کی مذاکرات کی کوششوں کی حمایت کی۔