دبئی: انٹرنیشنل کرکٹ کونسل (آئی سی سی) نے پاکستان ویمنز کرکٹ ٹیم کی کپتان فاطمہ ثنا پر جرمانہ عائد کر دیا۔

تفصیلات کے مطابق پاکستان ویمنز کرکٹ ٹیم کی کپتان فاطمہ ثنا کو میچ فیس کا 10 فیصد جرمانہ عائد کیا گیا ہے۔ ساتھ ہی انہیں ایک ڈی میرٹ پوائنٹ بھی دیا گیا ہے۔

رپورٹس کے مطابق ویمنز کرکٹ ٹیم کی کپتان پر 24 ماہ میں دوسرا جرمانہ ہونے پرڈی میرٹ پوائنٹس کی تعداد 2 ہوگئی۔

پاکستان ویمنز ٹیم کی کپتان نے بھارت کیخلاف شفالی ورما کو آؤٹ کرکے باہر جانے کا اشارہ کیا تھا۔

واضح رہے کہ ویمنز ایشیا کپ کے میچ میں بھارتی ویمنز ٹیم نے پاکستان کو 7 وکٹوں سے شکست دے دی تھی۔

دبئی میں کھیلے گئے میچ میں پاکستان کی جانب سے دیا گیا 56 رنز کا ہدف بھارت نے 8.4 اوورز میں 3 وکٹوں کے نقصان پر حاصل کرلیا تھا۔