National

حکومت نے 10 لاکھ ٹن خام چینی کی ڈیوٹی فری درآمد کی اجازت دی

20/08/26

نئی دہلی، 20 اگست: گھریلو بازار میں چینی کی قیمتوں میں تیزی کے درمیان حکومت نے جاری تہواروں کے موسم کے دوران 10 لاکھ ٹن خام چینی کی ڈیوٹی فری درآمد کی اجازت دی ہے ۔ڈائریکٹوریٹ جنرل آف فارن ٹریڈ (ڈی جی ایف ٹی) کی جانب سے جمعرات کو جاری نوٹیفکیشن کے مطابق یہ چھوٹ 31 اکتوبر تک کے لیے دی گئی ہے ۔ ڈی جی ایف ٹی نے اس کے لیے 21 سے 28 اگست 2026 کے دوران درآمد کنندگان سے درخواستیں طلب کی ہیں۔نوٹیفکیشن اور اس سے متعلق تفصیلات کے مطابق خام چینی کی درآمد ٹیرف ریٹ کوٹا (ٹی آر کیو) کے تحت کی جائے گی اور درخواست پر فیصلہ ڈی جی ایف ٹی کرے گا۔ ٹی آر کیو کے تحت درآمد کی گئی اس خام چینی کا استعمال چینی ملوں اور ریفائنریوں کے ذریعے سفید چینی تیار کرنے کے لیے کیا جائے گا۔ اس کے لیے ایڈوانس لائسنس رکھنے والے درخواست دے سکتے ہیں۔ایسی تیار شدہ چینی کا استعمال صرف گھریلو بازار میں فروخت کے لیے کیا جا سکے گا۔واضح رہے کہ گزشتہ کچھ عرصے سے گھریلو بازار میں چینی کی قیمتیں تیزی سے بڑھی ہیں۔ محکمہ امور صارفین کے اعداد و شمار کے مطابق، ایک ہفتے میں دہلی میں چینی کی خوردہ قیمت سوا گنا ہوگئی ہے ۔ یہ 13 اگست کو 49 روپے فی کلوگرام تھی جو آج 20 اگست کو بڑھ کر 61 روپے فی کلوگرام ہوگئی ہے ۔

Source: Admin