شیلانگ، 30 اگست: میگھالیہ کے ایسٹ گارو ہلز ضلع کے سونگساک علاقے میں اتوار کی صبح ناکہ چیکنگ مہم کے دوران پولیس کے ساتھ ہوئے تصادم میں چار مسلح بدمعاش ہلاک ہو گئے ۔
ایسٹ گارو ہلز کے ضلع پولیس سربراہ سواپنِل پوار وسنت را¶ کے مطابق یہ واقعہ صبح تقریباً 4 بجے دگل-سونگساک سڑک پر سونگساک ریزرو کے قریب پیش آیا۔ سکیورٹی چیکنگ کے لیے روکے جانے پر بولیرو گاڑی میں سوار بدمعاشوں نے پولیس ٹیم پر اندھا دھند فائرنگ شروع کر دی۔ پولیس کی جوابی کارروائی میں چاروں مشتبہ افراد زخمی ہو گئے اور بعد میں انہوں نے دم توڑ دیا۔ اس دوران پولیس کی گاڑی کو بھی گولیوں سے نقصان پہنچا۔
ہلاک شدگان کی شناخت شمالی گارو ہلز کے الَاسان مراک اور آسام کے گولپارہ ضلع کے سُستوَم رابھا، کلام علی اور بابی السلام کے طور پر ہوئی ہے ۔ پولیس کے مطابق مراک حال ہی میں ڈامرا میں ہوئی فائرنگ کے واقعے کا اصل ملزم تھا، جس میں ایک تاجر کی جان چلی گئی تھی۔ سُستوَم رابھا اور کلام علی کے خلاف آسام اور میگھالیہ کے مختلف تھانوں میں ڈکیتی، اغوا، بھتہ خوری اور آرمز ایکٹ کے تحت کئی مقدمات درج تھے ۔
پولیس نے جائے وقوعہ اور بدمعاشوں کے قبضے سے دو فیکٹری میں تیار شدہ پستول، گولیاں اور خالی کارتوس برآمد کیے ہیں۔ ان میں سے ایک پستول پر 'بیریٹا' لکھا ہوا ہے ۔ پولیس نے معاملے کی قانونی جانچ شروع کر دی ہے اور عوام سے افواہوں پر توجہ نہ دینے کی اپیل کی ہے ۔