احمد آباد: گجرات کے شہر احمد آباد کے وسٹراپور گارڈن میں نوبل امن انعام یافتہ ملالہ یوسفزئی کی خودنوشت سوانح عمری ’آئی ایم ملالہ‘ (I Am Malala) پڑھنے کی ایک تقریب پر متشدد حملہ ہوا ہے۔ پولیس کے مطابق، مبینہ طور پر وشو ہندو پریشد (VHP) اور بجرنگ دل سے تعلق رکھنے والے مسلح افراد کے ایک گروپ نے کتاب خوانی میں حصہ لینے والے شرکاء پر حملہ کر دیا، جس کے نتیجے میں دو افراد زخمی ہو گئے۔ پولیس نے اس سلسلے میں فوری کارروائی کرتے ہوئے تین ملزمان کو گرفتار کر لیا ہے۔
خبر رساں ایجنسی کے مطابق، یہ واقعہ جمعرات کی شام کو اس وقت پیش آیا جب تقریباً 70 افراد وسٹراپور گارڈن میں کتاب خوانی کے لیے جمع ہوئے تھے۔ یہ پروگرام دراصل ایک نجی اسکول کی جانب سے دائیں بازو کی تنظیموں اور والدین کے احتجاج کے بعد ملالہ یوسفزئی اور این فرینک کی کتابوں کو نصاب سے ہٹائے جانے کے خلاف بطور احتجاج منعقد کیا گیا تھا۔

وسٹراپور پولیس اسٹیشن کی انسپکٹر جی ایم چودھری نے بتایا کہ جب کتاب پڑھنے والے افراد سیشن ختم کر کے پارک سے نکل رہے تھے، تب 18 سے 20 افراد پر مشتمل ایک لاٹھی دھاری گروپ وہاں پہنچا۔ حملہ آوروں نے بجرنگ دل اور وشو ہندو پریشد سے وابستہ ہونے کا دعویٰ کرتے ہوئے سخت غصے میں سوال کیا کہ وہ ملالہ یوسفزئی کی کتاب کیوں پڑھ رہے تھے۔ بات چیت میں تلخی کے بعد وہاں ہاتھا پائی شروع ہو گئی اور لاٹھیوں سے کیے گئے اس حملے میں دو افراد زخمی ہو گئے۔
پولیس کے مطابق، بھارتیہ نیائے سنہیتا (BNS) کی مختلف دفعات کے تحت فساد برپا کرنے، غیر قانونی اجتماع اور جسمانی نقصان پہنچانے کی بنیاد پر ایف آئی آر درج کر لی گئی ہے۔