احمد آباد میں پیش آنے والے دردناک سانحے میں اطلاعات کے مطابق ایئر انڈیا کی پرواز حادثے کا شکار ہونے کے بعد میگھانی نگر کے بی جے میڈیکل کالج کے ہاسٹل میس سے ٹکرا گئی، جس کے سبب مبینہ طور پر ہاسٹل کے احاطے میں مقیم میڈیکل طلبا کی بھی جانیں گئی ہیں اور سیکڑوں زخمی ہوئے ہیں۔ عینی شاہدین کے بیانات اور ابتدائی رپورٹس بتاتی ہیں کہ حادثے کے وقت متعدد طلبہ ہاسٹل یا میس ہال کے اندر تھے۔ اچانک ہونے والے حادثے اور اس کے نتیجے میں ہونے والے دھماکے نے ہوا اور زمین دونوں پر بڑے پیمانے پر جانی نقصان پہنچایا ہے۔ بی جے میڈیکل کالج گجرات کے سب سے بڑے سرکاری زیر انتظام طبی اداروں میں سے ایک ہے۔ ان رپورٹس کے سامنے آنے کے بعد کہ ایئر انڈیا کی فلائٹ کے حادثے نے کیمپس کے ہاسٹل میس کے احاطے کو بھی متاثر کیا ہے، تشویش میں مزید اضافہ ہو گیا ہے۔ اگرچہ سرکاری طور پر اس کی تصدیق کا ابھی انتظار ہے، تاہم سامنے آنے والی فوٹوز اور ویڈیوز میں دیکھا جا سکتا ہے کہ جہاز کا ایک حصہ میس کے اوپر اٹکا ہوا ہے اور ہاسٹل کی عمارت کو شدید نقصان پہنچا ہے۔ احمد آباد کے قلب میں واقع بی جے میڈیکل کالج ایک اعلیٰ طبی تعلیمی ادارہ ہے۔ اس کے ہاسٹل کی سہولیات میں سیکڑوں ایم بی بی ایس اور پوسٹ گریجویٹ طلباء کو رہائش فراہم کی جاتی ہے، جن میں سے اکثر کیمپس میں کل وقتی طور پر رہائش پذیر ہیں۔ ہاسٹل میس میں ہوئے حادثے کو طلباء اور فیکلٹی نے ’’ناقابل تصور‘‘ قرار دیا ہے۔

Source: social media