بولی وڈ سُپر اسٹار سلمان خان نے اداکارہ کترینہ کیف کی باڈی شیمنگ کرنے والوں پر سخت برہمی کا اظہار کر دیا۔

بگ باس 20 کے ویک اینڈ کا وار ایپیسوڈ کے دوران سلمان خان آن لائن ٹرولنگ پر سخت غصے میں نظر آئے۔ انہوں نے کیمرے کے سامنے اپنی شرٹ اتار دی اور ٹرولرز کو چیلنج دیا کہ وہ ان پر تنقید کر کے دکھائیں۔ انہوں نے کہا کہ وزن بڑھنے اور عمر ڈھلنے پر انہیں بھی ٹرول کیا جاتا ہے۔

سلمان خان نے کسی کی ظاہری شکل پر تبصرے کرنے کے پیچھے کارفرما ذہنیت پر سوال اٹھایا اور لوگوں کو نصیحت کی کہ وہ دوسروں پر تنقید کرنے سے پہلے خود اپنے گریبان میں جھانکیں۔


اداکار نے اس بات کا بھی ذکر کیا کہ خواتین کو ماں بننے کے بعد طعنے دیے جاتے ہیں جو حمل کے بعد موٹاپے کا شکار ہو جاتی ہیں، حاملہ ہونے اور وزن بڑھنے پر کسی کو بھی کیوں ٹرول کیا جانا چاہیے؟ خواتین جب تیار ہوں گی تو وہ کام پر بھی واپس آ جائیں گی اور اپنی فٹنس بھی بحال کر لیں گی۔

اگرچہ سلمان خان نے کترینہ کیف کا نام براہ راست نہیں لیا لیکن ان کے یہ ریمارکس اداکارہ پر حمل کے بعد ان کے حلیے کو لے کر کی جانے والی سوشل میڈیا ٹرولنگ کے تناظر میں سامنے آئے۔

یاد رہے کہ سلمان خان اور کترینہ کیف کئی فلموں میں ایک ساتھ کام کر چکے ہیں۔