سعودی ولی عہد و وزیراعظم شہزادہ محمد بن سلمان نے پاکستان اور انڈیا کے درمیان جنگ بندی کے فیصلے کا خیر مقدم کیا ہے۔ سعودی دارالحکومت ریاض میں منعقد ہونے والے خلیجی امریکی سربراہی اجلاس سے خطاب کرتے ہوئے محمد بن سلمان نے کہا کہ ’ہم امید کرتے ہیں کہ جنگ بندی معاہدہ کشیدگی کو روکنے اور دونوں ممالک کے درمیان امن بحال کرنے میں مددگار ثابت ہوگا۔‘ اجلاس سے خطاب میں سعود ولی عہد نے کہا کہ ’فلسطینی مسئلے کا حل عرب امن منصوبے اور بین الاقوامی قراردادوں کے مطابق نکالا جانا چاہیے۔ ہم خطے کو درپیش چیلنجز سے آگاہ ہیں اور غزہ کی پٹی میں جنگ کو روکنے کے لیے مستقل حل تلاش کرنا ضروری ہے۔‘ ولی عہد نے مزید کہا کہ ’ہم صدر ٹرمپ کے اس فیصلے کو سراہتے ہیں جس کے تحت شام پر عائد پابندیاں ختم کی گئی ہیں اور جس سے شامی بھائیوں کی مشکلات میں کمی آئے گی۔‘ ’ہمیں امید ہے کہ یہ سربراہی اجلاس اپنے مشترکہ اہداف کے حصول میں کامیاب ہوگا جو خطے کی ترقی اور خوشحالی کا باعث بنے گا۔‘ ولی عہد شہزادہ محمد بن سلمان کا کہنا تھا کہ ’یہ سربراہی کانفرنس علاقائی اور بین الاقوامی مسائل کے سلسلے میں تعاون اور ہم آہنگی کا تسلسل ہے جس کا مقصد خطے میں امن و سلامتی کو مضبوط بنانا ہے۔‘ اجلاس میں خلیجی امریکی سٹریٹیجک تعاون، علاقائی اور بین الاقوامی چیلنجز اور خطے کی امن و سلامتی پر بات چیت ہوئی۔

Source: Social Media