جموں و کشمیر میں وزیر اعظم نریندر مودی نے جمعہ کے روز دنیا کے سب سے اونچے ’چناب ریل پل‘ کا افتتاح کیا۔ اس موقع پر جموں و کشمیر کے لیفٹیننٹ گورنر منوج سنہا، مرکزی وزیر اشونی ویشنو اور وزیر اعلیٰ عمر عبداللہ بھی وزیر اعظم کے ساتھ موجود تھے۔ وزیر اعظم نے پل پر چہل قدمی کی، ترنگا لہرایا اور اس پل کو قوم کے نام وقف کیا۔ اس تقریب سے قبل وزیر اعظم نے پل کا معائنہ کیا اور ریلوے بورڈ کے سی ای او ستیش کمار سے تفصیلات حاصل کیں۔ اس دوران انہوں نے اودھم پور-سری نگر-بارہمولہ ریلوے لنک پروجیکٹ کی ٹیم سے بھی گفتگو کی اور انہیں اس عظیم الشان کارنامے پر مبارکباد دی۔ چناب ریل پل دنیا کا سب سے اونچا ریلوے آرچ پل ہے، جو دریائے چناب پر 359 میٹر کی بلندی پر واقع ہے۔ یہ پیرس کے مشہور ایفل ٹاور سے 35 میٹر اور دہلی کے قطب مینار سے تقریباً 287 میٹر اونچا ہے۔ پل کی لمبائی 1315 میٹر ہے اور یہ اودھم پور-سری نگر-بارہمولہ ریلوے لنک پروجیکٹ کا حصہ ہے، جس کی مجموعی لمبائی 272 کلومیٹر ہے۔ اس پل کی تعمیر پر تقریباً 1486 کروڑ روپے لاگت آئی ہے اور اسے 266 کلومیٹر فی گھنٹہ کی رفتار سے چلنے والی ہوا کو برداشت کرنے کے قابل بنایا گیا ہے۔ اس کا ڈیزائن نہ صرف تکنیکی لحاظ سے حیران کن ہے بلکہ یہ زلزلے اور منفی درجہ حرارت جیسے سخت موسمی حالات کا بھی مقابلہ کر سکتا ہے۔ وزیر اعظم مودی نے پل کے افتتاح کے بعد ایک فوٹو نمائش بھی دیکھی، جس میں پل کی تعمیر کے دوران پیش آنے والی تکنیکی مشکلات اور مزدوروں کی محنت کو نمایاں کیا گیا تھا۔ انہوں نے ان انجینئروں اور مزدوروں سے ملاقات بھی کی جنہوں نے انتہائی مشکل حالات میں اس پراجیکٹ کو مکمل کیا۔ اس پل کو نہ صرف ایک انجینئرنگ کارنامہ قرار دیا جا رہا ہے بلکہ یہ کشمیر میں سیاحت کو بحال کرنے اور وادی کو ملک کے دیگر حصوں سے جوڑنے کی سمت ایک بڑا قدم بھی سمجھا جا رہا ہے۔ پل کی افتتاحی تقریب ایسے وقت میں ہوئی ہے جب حالیہ دنوں میں پہلگام میں ایک دہشت گردانہ حملہ پیش آیا تھا، جس کے بعد وزیر اعظم کا یہ دورہ ایک مضبوط پیغام کے طور پر دیکھا جا رہا ہے۔

Source: social media