سرینگر: بھارت کے ابھرتے ہوئے مکسڈ مارشل آرٹس اسٹار اویس یعقوب نے اپنے کریئر کی سب سے بڑی جیت درج کی۔ انہوں نے 'بریو کامبیٹ فیڈریشن' کے 68 کلوگرام کیچ ویٹ مقابلے کے پہلے ہی راؤنڈ میں بلغاریہ کے ناقابلِ شکست فائٹر ڈیلین جارجیوف کو ٹیکنیکل ناک آؤٹ کر کے ہرا دیا۔ جموں و کشمیر کے پلوامہ سے تعلق رکھنے والے 28 سالہ اویس کو میدان کے اندر جارجیوف کو زیر کرنے کے لیے محض چار منٹ کا وقت لگا۔ انہوں نے بلغاریائی فائٹر کو ان کے پیشہ ورانہ کریئر کی پہلی شکست کا سواد چکھایا اور مسلسل چھٹی جیت کے ساتھ اپنی فتوحات کا سلسلہ برقرار رکھا۔ اویس، جو 1-5 کے ریکارڈ کے ساتھ اس مقابلے میں اترے تھے، اب 1-6 کے ریکارڈ پر پہنچ گئے ہیں، جب کہ جارجیوف کا ریکارڈ گر کر 1-3 ہو گیا ہے۔ اویس کی یہ جیت تمام تر اندازوں اور توقعات کے برعکس تھی۔ 'ٹیپولوجی' کے مطابق، 73 فیصد مداحوں نے پیشگوئی کی تھی کہ یہ مقابلہ جارجیوف جیتیں گے۔ اس کے برعکس، اویس نے مقابلے کے آغاز سے ہی حاوی ہو کر 32 سالہ بلغاریائی فائٹر کو سنبھلنے کا بالکل موقع ہی نہیں دیا اور بالآخر انہیں شکست دے دی۔ جب ریفری نے میچ ختم کرنے کا اشارہ کیا تو اویس نے کیج (پنجرے) کے اوپر چڑھ کر جشن منایا، جب کہ کمنٹیٹرز نے اس شاندار کارکردگی کو بھارتی ایم ایم اے کے لیے ایک تاریخی لمحہ قرار دیا۔ کیج میں قدم رکھنے سے پہلے ہی اویس نے بڑے اعتماد کے ساتھ پیش گوئی کی تھی کہ وہ پہلے ہی راؤنڈ میں مقابلہ ختم کر دیں گے۔ انہوں نے بہترین اسٹرائیکنگ اور حریف پر مسلسل دباؤ برقرار رکھ کر اپنے اس وعدے کو سچ کر دکھایا۔ کشمیر سے تعلق رکھنے والے اس فائٹر نے روایتی کشمیری قراقلی ٹوپی، سیاہ پشمینہ شال پہنے اور ہاتھ میں بھارت کا ترنگا تھامے کیج کی طرف یادگار واک کی۔ بلیو کارنر سے لڑنے والے اویس نے جیت کے بعد جالی پر چڑھ کر مداحوں اور اپنی ٹیم کا شکریہ ادا کیا۔ جیت کے بعد جذباتی نظر آنے والے اویس نے ان چیلنجز اور مشکلات کا تذکرہ کیا جن پر قابو پا کر انہوں نے یہ کامیابی حاصل کی۔ مقابلے کے بعد انہوں نے کہا کہ "الحمدللہ! بلغاریہ والوں آپ کا شکریہ کہ آپ نے میری حمایت نہیں کی، لیکن ایک دن آپ مجھ سے محبت کریں گے۔ ہم پیشہ ور فائٹرز ہیں۔ میں بھارت کے لیے بیلٹ لانا چاہتا ہوں۔ آپ کو اندازہ نہیں ہے کہ مجھ پر کتنا دباؤ تھا۔ ہم نے 40 گھنٹے کا طویل سفر کیا، دو دن تک بالکل نہیں سوئے اور میں نے اپنے وزن کو برقرار رکھنے پر بھی سخت محنت کی۔"

Source: Admin