ممبئی کی ایک لوکل ٹرین میں مرد مسافر کی جانب سے نامناسب انداز میں چھونے پر احتجاج کرنے والی نوجوان خاتون کو ٹرین سے دھکا دے دیا گیا، جس کے نتیجے میں خاتون کا بایاں بازو کٹ گیا اور سر پر 16 ٹانکے بھی آئے۔
یہ واقعہ 4 نومبر کو پیش آیا اور اس نے لوکل ٹرینوں میں خواتین کے تحفظ کے معاملے کو ایک بار پھر اٹھا دیا ہے۔
پولیس نے ملزم کو گرفتار کرلیا، جس کی شناخت نئے گاؤں ایسٹ کے رہائشی 53 سالہ جتیندر ہرمکھے کے نام سے ہوئی ہے۔ متاثرہ خاتون بوریولی سے ویرار جانے والی لوکل ٹرین میں سوار ہوئی تھیں۔ اس نے الزام عائد کیا کہ نائیگاؤں اسٹیشن پر اسے ٹرین سے دھکا دیا گیا۔
خاتون کی جانب سے درج کرائی گئی شکایت کے مطابق ملزم مسلسل اسے نامناسب انداز میں چھو رہا تھا۔ اس کی اس حرکت پر برہم خاتون نے چپل اتار کر ملزم کو دے مارا، جس کے بعد دونوں کے درمیان تلخ کلامی شروع ہوگئی۔ مسافروں نے معاملہ ختم کرانے کی کوشش کی، تاہم ملزم نے فحش کلامی کرتے ہوئے خاتون کو اپنی چپل سے مارا۔
ٹرین جب نائیگاؤں اسٹیشن پہنچی تو ملزم نے خاتون کو ٹرین سے دھکا دے دیا، جس کے باعث وہ دو بوگیوں کے درمیان موجود خلا میں جاگری اور واپس چڑھنے کی کوشش کے دوران ٹرین چل پڑی اور اسکا بایاں بازو پہیوں کے نیچے آگیا۔ اس حادثے میں خاتون کا بازو کہنی کے قریب سے کٹ گیا اور شدید چوٹیں آئیں۔
پولیس اہلکار اور دیگر مسافروں نے خاتون کو واپس پلیٹ فارم پر پہنچایا۔ اس دوران ملزم افراتفری کا فائدہ اٹھاتے ہوئے موقع سے فرار ہوگیا، تاہم اسے 9 نومبر کو گرفتار کرلیا گیا۔
اسپتال میں میڈیا سے گفتگو کرتے ہوئے خاتون نے کہا مجھے انصاف چاہیے۔ میری پوری زندگی برباد ہوگئی ہے۔ میں ہی گھر کے تمام معاملات اور ذمہ داریاں سنبھالتی تھی۔ اب صرف ایک بازو کے ساتھ میں کچھ بھی نہیں کرسکتی۔
دوسری جانب متاثرہ خاتون کے اہل خانہ نے پولیس تفتیش پر تحفظات کا اظہار کیا ہے۔ ان کا کہنا ہے کہ ملزم کے خلاف اقدام قتل کی دفعات شامل نہیں کی گئی۔
ممبئی کی ایک لوکل ٹرین میں مرد مسافر کی جانب سے نامناسب انداز میں چھونے پر احتجاج کرنے والی نوجوان خاتون کو ٹرین سے دھکا دے دیا گیا، جس کے نتیجے میں خاتون کا بایاں بازو کٹ گیا اور ...
Source: Admin
