National

دہلی کے جنتر منتر پر زبردست ہنگامہ: ’ریزرویشن ہٹاؤ تحریک‘ کے مظاہرین حراست میں!

21/08/26

نئی دہلی:

قومی دارالحکومت نئی دہلی کے تاریخی مقام جنتر منتر پر ’ریزرویشن ہٹاؤ آندولن‘ (کوٹہ مخالف سوشل میڈیا تحریک) کی کال پر جمع ہونے والے ایک بڑے ہجوم پر پولیس نے سخت ایکشن لیتے ہوئے جمعہ کے روز متعدد مظاہرین کو حراست میں لے لیا۔ انتظامیہ نے واضح کیا ہے کہ جنتر منتر کے اطراف میں کسی بھی قسم کے مظاہرے کی اجازت نہیں تھی، لیکن اس کے باوجود مظاہرین کی بڑی تعداد وہاں جمع ہو گئی۔

مظاہرین کو سوشل میڈیا پلیٹ فارمز کے ذریعے متحرک کیا گیا تھا۔ وہ ہاتھوں میں بینرز، پوسٹرز اور زعفرانی پرچم تھامے ذات پات کی بنیاد پر ریزرویشن کے خلاف شدید نعرے بازی کر رہے تھے۔

مطالبات: مظاہرین کا مطالبہ ہے کہ سرکاری ملازمتوں اور تعلیمی اداروں میں رعایت کے لیے ذات پات کی بجائے معاشی حالت کو بنیادی معیار بنایا جائے۔

جنتر منتر اور اس کے اطراف کے اہم راستوں پر دہلی پولیس اور پیراملٹری فورسز کی بھاری نفری تعینات کی گئی تھی اور بیریکیڈز لگا کر مظاہرین کی پیش قدمی کو روکا گیا۔

دہلی پولیس کے ایک سینئر افسر نے بتایا کہ جنتر منتر پر کسی بھی قسم کا ہجوم یا مظاہرہ کرنے کی اجازت نہیں دی گئی تھی۔ پولیس کے مطابق ’ریزرویشن ہٹاؤ آندولن‘ کو صرف رام لیلا میدان میں پرامن احتجاج کے لیے این او سی جاری کی گئی تھی، لیکن اس کے باوجود جنتر منتر پر جمع ہونے پر قانون نافذ کرنے والے اداروں نے فوری کارروائی کرتے ہوئے متحرک مظاہرین کو حراست میں لے کر علاقے کو خالی کروا لیا۔

Source: Admin