مغربی بنگال کے سابق وزیراعلیٰ مرحوم بدھادیب بھٹاچاریا کی اہلیہ میرا بھٹاچاریا کی طبعیت اچانک بگڑنے کے بعد انہیں جنوبی کولکاتا (علی پور) کے ایک نجی اسپتال میں داخل کرایا گیا ہے۔ 70 سال سے زائد العمر میرا بھٹاچاریا جمعہ کی دوپہر طبی معائنے کے لیے اسپتال پہنچی تھیں، جہاں ان کی حالت کو مدنظر رکھتے ہوئے ڈاکٹروں نے انہیں فوری طور پر داخل کرنے کا فیصلہ کیا۔ فی الوقت وہ معروف ڈاکٹر سوپتک پانڈا کی زیرِ نگرانی علاج کروا رہی ہیں۔ اسپتال انتظامیہ کا کہنا ہے کہ ان کی حالت مستحکم ہے، تاہم مزید دیکھ بھال کے لیے انہیں کچھ وقت زیرِ مشاہدہ رکھا جائے گا۔

خاندانی ذرائع کے مطابق میرا بھٹاچاریا گزشتہ چند دنوں سے شدید کھانسی، سانس لینے میں تکلیف اور پیٹ کے درد میں مبتلا تھیں۔ جمعرات کو طبعیت مزید ناساز ہوئی اور جمعہ کو بھی بہتری نہ آنے پر ان کے قریبی دوستوں نے اسپتال سے رابطہ کیا۔ ڈاکٹروں کے مطابق ان کے پھپھڑوں میں انفیکشنکی تشخیص ہوئی ہے، تاہم پریشانی کی کوئی بات نہیں ہے اور وہ فی الحال مستحکم ہیں۔ واضح رہے کہ میرا بھٹاچاریا کو دل کا عارضہ بھی لاحق ہے اور ان کے دل میں پیس میکر لگا ہوا ہے۔
والدہ کی بیماری کی خبر ملتے ہی ان کے واحد فرزند سوچیتن بھٹاچاریا نے ان کی خیریت دریافت کی اور جلد صحتیابی کی دعا کی۔ بدھادیو بھٹاچاریا کے انتقال کے بعد سے میرا بھٹاچاریا بالی گنج کی پام ایونیو والی رہائش گاہ پر اکیلی رہ رہی تھیں، جبکہ ان کے فرزند علیحدہ رہتے ہیں۔

قریبی ذرائع کے مطابق، میرا بھٹاچاریا کی اچانک علالت کی خبر کے بعد ریاستی سیاسی حلقوں میں بھی تشویش پائی جا رہی ہے اور جلد ہی اعلیٰ حکام ان کی عیادت یا خیریت دریافت کر سکتے ہیں۔ اس وقت ان کے اہل خانہ اور مداحوں کی یہی دعا ہے کہ وہ جلد از جلد انفیکشن سے صحتیاب ہو کر گھر واپس لوٹیں۔

Source: Admin