دہلی/کولکاتا:لیفت فرنٹ کے چیئرمین اور سی پی آئی ایم کے سینئر رہنما بمان بوس کو علاج کے لیے دہلی کے آل انڈیا انسٹی ٹیوٹ آف میڈیکل سائنسز (ایمس) میں داخل کرایا گیا ہے۔ ۸۶ سالہ رہنما کے بارے میں سی پی آئی ایم کے ریاستی سکریٹری محمد سلیم نے بتایا کہ وہ معمول کے طبی معائنے کے لیے اسپتال میں موجود ہیں۔ تاہم، پارٹی ذرائع کے مطابق، معائنے کے دوران ان کا ایک چھوٹا سا آپریشن کیا گیا ہے
واضح رہے کہ ۲۰۲۴ء کے آخر میں بھی صحت کی خرابی کی وجہ سے بمان بوس کو کولکاتا کے ایک اسپتال میں داخل کرایا گیا تھا، جس کے بعد سے وہ مسلسل ڈاکٹروں کی کڑی نگرانی اور ہدایات کے تحت رہے ہیں۔
گزشتہ مارچ میں جب بائیں بازو کی جماعتوں نے مغربی بنگال کے اس وقت کے چیف الیکشن آفیسر منوج اگروال کے دفتر کے باہر رات بھر دھرنا دیا تھا، تو بمان بوس بھی اس مظاہرے میں شامل ہوئے تھے۔ لیکن ڈاکٹروں کی پابندی کی وجہ سے وہ رات بھر وہاں نہیں رک سکے تھے، جس کا انہیں شدید افسوس بھی تھا۔ اس موقع پر اپنے جذباتی بیان میں بمان بوس نے کہا تھا: "۱۹۷۱ء کے بعد سے کولکاتا میں جتنی بھی رات کی مہمات اور احتجاجی پروگرام ہوئے، میں ان سب میں موجود رہا ہوں۔ لیکن یہ پہلا موقع تھا جب میں طبی وجوہات کی بنا پر رات بھر نہیں رہ سکا۔"
طویل پیدل مارچ اور احتجاجی مظاہروں میں اگلی صف میں رہنے کی وجہ سے بمان بوس کو سی پی آئی ایم کے اندر 'ہنٹن کے ہیڈ ماسٹر' (پیدل چلنے کا استاد) کہا جاتا ہے۔ تقریباً سات سال پہلے رانی راس مانی روڈ پر پارٹی کے ایک شبینہ پروگرام میں انہوں نے نہ صرف خود جاگ کر رات گزاری تھی، بلکہ سوتے ہوئے کارکنوں کو لکڑی کی چھڑی سے ٹٹول کر بیدار بھی کیا تھا۔تاہم، ۲۰۲۲ء میں ہگلی میں مذہبی کشیدگی کے خلاف نکالی گئی امن مارچ کے دوران ان کی بڑھتی ہوئی عمر کے اثرات نمایاں ہوئے تھے، جب وہ آدھا گھنٹہ پیدل چلنے کے بعد کھلی گاڑی میں سوار ہو گئے تھے۔ ۲۰۲۴ء کے بعد سے ان کی صحت اور سرگرمیوں پر طبی ماہرین مسلسل نظر رکھے ہوئے ہیں۔

Source: Admin