مہاراشٹر اسمبلی انتخابات سے پہلے، الیکشن کمیشن نے پیر کو ریاستی حکومت کو ہدایت دی کہ ڈی جی پی رشمی شکلا کا فوری اثر سے تبادلہ کیا جائے۔ یہ کارروائی کانگریس سمیت سیاسی جماعتوں کی شکایت کے بعد کی گئی۔ ریشمی شکلا کی جگہ وویک پھنسالکر کو ڈی جی پی کا چارج دیا گیا ہے۔ ذرائع کے مطابق الیکشن کمیشن نے مہاراشٹر کے چیف سکریٹری کو ہدایت دی کہ وہ رشمی شکلا کا چارج کیڈر کے اگلے سینئر ترین آئی پی ایس افسر کو سونپ دیں۔ چیف سکریٹری کو ڈی جی پی کے عہدے پر تقرری کے لیے منگل کی دوپہر تک تین آئی پی ایس افسران کا ایک پینل بھیجنے کی بھی ہدایت دی گئی۔ مہاراشٹر میں 20 نومبر کو انتخابات ہونے ہیں۔ حال ہی میں ایک جائزہ میٹنگ کے دوران، چیف الیکشن کمشنر (سی ای سی) راجیو کمار نے عہدیداروں کو خبردار کیا کہ وہ نہ صرف غیر جانبدار رہیں بلکہ اس بات کو بھی یقینی بنائیں کہ وہ اپنے فرائض کی انجام دہی کے دوران جانبداری کا مظاہرہ نہ کریں۔ قبل ازیں 29 اکتوبر کو راجیو کمار نے مہاراشٹر میں سیاسی طور پر محرک جرائم پر تشویش کا اظہار کیا تھا اور ڈی جی پی شکلا سے کہا تھا کہ وہ ایسے واقعات کے خلاف سخت کارروائی کو یقینی بنائیں۔ اس سے پہلے این سی پی لیڈر بابا صدیقی کے قتل نے سیاسی ہلچل مچا دی تھی۔ 12 اکتوبر کو، انہیں باندرہ ایسٹ میں تین بندوق برداروں نے گولی مار کر ہلاک کر دیا۔

Source: Social Media