جموں، 12 اپریل (:جموں وکشمیر کے ضلع کشتواڑ کے چھاترو جنگل علاقے میں سیکورٹی فورسز کے ساتھ انکائونٹر کے دوران تین ملی ٹنٹ ہلاک ہوئے ہیں جبکہ آپریشن ہنوز جاری ہے۔ فوج کی وائٹ نائٹ کور نے 'ایکس' پر ایک پوسٹ کے ذریعے جانکاری فراہم کرتے ہوئے کہا کہ کشتواڑ کے چھاترو جنگل میں جاری آپریشن کے دوران خراب موسمی صورتحال کے باوجود مزید دو پاکستانی دہشت گردوں کو ہلاک کر دیا گیا۔انہوں نے کہا کہ اس دوران ایک اے کے 47 رائفل اور ایک ایم 4 رائفل سمیت بھاری مقدار میں جنگی سامان بھی بر آمد کیا گیا۔ واضح رہے کہ اس انکائونٹر میں گذشتہ روز ایک ملی ٹنٹ مارا گیا تھا۔ ڈی آئی جی کشتواڑ-ڈوڈہ رینج، شری دھر پاٹل نے جمعے کے روز نامہ نگاروں کو بتایا: ' چھاترو کے جنگلات میں جاری آپریشن کے دوران ایک ملی ٹینٹ کو ہلاک کر دیا گیا ہے، جبکہ اس کے دیگر ساتھیوں کو بھی گھیرے میں لے لیا گیا ہے'۔ان کا کہنا تھا کہ گزشتہ تین روز سے جاری اس آپریشن میں فورسز نے جنگل میں موجود ملی ٹینٹوں کے گرد گھیرا تنگ کر دیا ہے اور توقع ہے کہ جلد ہی باقی ملی ٹینٹوں کو بھی مار گرایا جائے گا۔

Source: uni urdu news service