اگرتلہ، 13 اپریل : تریپورہ کے انوکوٹی ضلع کے کیلاشہر کی ایک مقامی عدالت نے اتوار کو وقف ترمیمی ایکٹ کے خلاف احتجاج کرنے والے کبجھار گاؤں میں تشدد بھڑکانے اور پولیس پر حملہ کرنے والے آٹھ ملزمان کو 10 دن کی عدالتی حراست میں بھیج دیا۔ انوکوٹی کے پولیس سپرنٹنڈنٹ پی سدامبیکا آر نے کہا کہ پولیس نے اس واقعہ کے بعد ایک خصوصی کیس درج کرکے تحقیقات شروع کردی ہے۔ واقعے میں مبینہ طور پر ملوث کچھ دیگر افراد کے خلاف سرچ آپریشن جاری ہے۔ تاہم مزید تشدد کو روکنے کے لیے پورے علاقے میں اضافی فورسز کو تعینات کیا گیا ہے۔ اطلاعات کے مطابق ہفتہ کے روز مظاہرین کے پرتشدد حملے میں ایک سب ڈویژنل پولیس آفیسر (ایس ڈی پی او) اور کچھ انسپکٹرز سمیت کم از کم 18 پولیس اہلکار زخمی ہوئے، جب کہ 60 کے قریب مظاہرین زخمی ہوئے اور ان میں سے کچھ کو اسپتال میں داخل کرایا گیا۔ ایک احتجاجی، جہانگیر (51) ضلع اسپتال میں زیر علاج ہے اور اس کی حالت نازک بتائی جاتی ہے۔ مسلمانوں نے ہفتے کے روز اقلیتی اکثریتی سرحدی ذیلی بلاکس - انا کوٹی ضلع کے کیلاشہر اور سپاہیجالا ضلع کے سونامورا میں احتجاجی مظاہرہ کیا۔ دونوں مظاہروں نے پرتشدد شکل اختیار کر لی اور کیلاشہر میں اس وقت صورتحال مزید خراب ہو گئی جب مظاہرین نے مبینہ طور پر تعینات پولیس اہلکاروں پر پتھراو اور اینٹ برسانا شروع کر دیا۔ مظاہرین کے ایک گروپ نے رکاوٹیں توڑنے کی کوشش کی جس سے ہاتھا پائی ہوئی۔ مظاہرین کے جارحانہ رویے کے جواب میں پولیس کو بھیڑ کو منتشر کرنے کے لیے لاٹھی چارج اور آنسو گیس کا استعمال کرنا پڑا۔ ایک اور متعلقہ پیش رفت میں، ناگرک ادھیکار منچ کے بینر تلے وقف ترمیمی ایکٹ کے خلاف ایک اور ریلی سونامورا میں نکالی گئی۔ ہزاروں مظاہرین نے شہر کے پرانے موٹر اسٹینڈ سے رابندر چوموہانی تک مارچ کیا، جہاں وقف ترمیمی ایکٹ کی مذمت کے لیے ایک اجتماعی اجلاس منعقد کیا گیا۔ مقامی ذرائع نے بتایا کہ مظاہرین کے ایک گروپ نے فائر گاڑی میں توڑ پھوڑ کی جو ایک ہنگامی کال پر جا رہی تھی۔ وقف ترمیمی ایکٹ کے خلاف جاری احتجاج کے درمیان ہفتہ کی دوپہر سونامورا کے قریب ارالیہ گاؤں میں ہنگامی صورتحال سے نمٹنے والی گاڑی پر حملہ کیا گیا۔ سونامورا فائر آفس کو ربڑ کے باغات میں آگ لگنے کی اطلاع ملی۔ فوری طور پر ایک فائر ٹرک سائرن بجاتے ہوئے دفتر سے روانہ ہوا، جس میں سات اہلکار تھے۔ تاہم، فائر اسٹیشن سے صرف 25-30 میٹر کے فاصلے پر وقف ترمیمی ایکٹ مخالف ریلی کے مظاہرین نے فائر گاڑی کو روک دیا، پتھراؤ کیا اور اس کا اگلا شیشہ توڑ دیا۔ ڈرائیور پنکج دیبناتھ پر جسمانی طور پر حملہ کیا گیا اور دیگر کو گاڑی کے اندر ہی رہنے پر مجبور کیا گیا۔ ہجوم نے فائر انجن کو آگ لگنے کے مقام پر پہنچنے سے روکا اور ٹیم کو فائر اسٹیشن واپس جانے پر مجبور کردیا۔ تقریب کے مقررین نے مرکزی حکومت پر متنازعہ وقف ترمیمی قانون کے ذریعے مذہبی آزادی کی خلاف ورزی کا الزام لگایا۔ ان کے مطابق یہ قانون آزادی کے بعد اقلیتی برادریوں کو دیے گئے تاریخی اور آئینی تحفظات کو کمزور کرتا ہے۔ انہوں نے کہا کہ مساجد، مدارس اور مکتب – جنکی وقف املاک کے طور پر درجہ بندی کی گئی ہے – کمیونٹی کے ارکان کی طرف سے عطیہ کردہ مقدس جائیدادیں ہیں اور انہیں کمیونٹی کے کنٹرول میں رہنا چاہیے۔ انہوں نے الزام لگایا کہ اب تک کسی حکومت نے وقف املاک کے انتظام میں مداخلت نہیں کی ہے لیکن نئی ترمیم سے کمیونٹی کی کئی دہائیوں کی نگرانی ختم ہونے کا خطرہ ہے۔

Source: uni urdu news service