International

سعودی عرب کو امریکا اور اسرائیل کے جال میں نہیں پھنسنا چاہیے، حزب اللہ

01/08/26

ایران نواز لبنانی تنظیم حزب اللہ نے کہا ہے کہ سعودی عرب کو امریکا اور اسرائیل کے جال میں نہیں پھنسنا چاہیے۔ حزب اللہ نے بیان میں کہا کہ عراق کے خلاف امریکی جارحیت کی مذمت کرتے ہیں، سعودی عرب سے توقع تھی وہ امریکی اور اسرائیلی جال میں پھنسنے سے گریز کرے گا۔ حزب اللہ نے کہا کہ عراق کے خلاف جارحیت سے خطے کے لیے سنگین نتائج ہوں گے یہ اقدام صرف امریکا اور صیہونیوں کےایجنڈوں کی تکمیل کرتا ہے، دشمن کا مقصد خطے کو غیر مستحکم کرنا، امتِ مسلمہ میں تفرقہ پیدا کرنا، دشمن کا مقصد خطے کوکشیدگی، تنازعات اور جھگڑوں کی بھنور میں دھکیلنا ہے۔ خبر ایجنسی روئٹرز نے دعویٰ کیا ہے کہ حوثیوں نے عراق کی سرزمین سے سعودی عرب پر حملے کیے۔ روئٹرز کی رپورٹ کے مطابق حوثی حملے عراقی ایران نواز مسلح گروپوں کے تعاون سے کئےگئے اور ان حملوں میں سعودی عرب کے مشرقی صوبے میں تیل تنصیبات کو نشانہ بنایا گیا۔ سعودی عرب کے خلاف کارروائیاں پاسدارانِ انقلاب کی نگرانی میں کی گئیں جس کے بعد عراقی حکومت نے حملوں کی تحقیقات شروع کر دی ہیں اور حوثیوں نے ان حملوں کی ذمہ داری قبول کی ہے۔ حوثیوں کا موقف ہے کہ حملے یمن پر سعودی کارروائیوں کے جواب میں کیے گئے۔ رپورٹ میں بتایا گیا کہ حملوں کے جواب میں سعودی عرب اور امریکا نے ایران نواز گروہوں کے ٹھکانوں پر فضائی کارروائی کی۔

Source: Admin