سری نگر،26 اپریل:جنوبی کشمیرمیں ہفتہ کے روز تین دہشت گردوں کے رہائشی مکانات کو مسمار کر دیا گیا ہے، جن پر حالیہ پہلگام حملے میں ملوث ہونے کا شبہ ظاہر کیا جا رہا ہے۔ یہ کارروائیاں حکام کی جانب سے دہشت گردوں کے خلاف کریک ڈاؤن کے سلسلے میں کی گئیں ہیں۔ ذرائع نے بتایا کہ پلوامہ ضلع کے مرن علاقے میں لشکرِ طیبہ کے دہشت گرد احسان الحق شیخ کا مکان گزشتہ رات کو منہدم کر دیا گیا۔ احسان الحق شیخ پر پہلگام حملے میں ملوث ہونے کا الزام ہے۔ اسی دوران، کولگام کے متلہامہ علاقے میں دہشت گرد ذاکر احمد گنائی کا مکان دھماکہ خیز مواد سے تباہ کیا گیا۔ ذاکر گنائی کو 2023 سے سرگرم دہشت گردوں میں شمار کیا جاتا ہے اور ان کا بھی پہلگام حملے میں ملوث ہونے کا قوی امکان ظاہر کیا جا رہا ہے۔شوپیان کے چھوٹی پورہ علاقے میں بھی لشکرِ طیبہ کے دہشت گرد شاہد احمد کا گھر تباہ کیا گیا۔ شاہد کٹے پربھی پہلگام حملے میں شامل ہونے کا الزام عائد کیا جا رہا ہے۔حکام نے اس کارروائی کی تصدیق کرتے ہوئے بتایا کہ اس سے قبل جمعہ کے روز بھی ترال میں دہشت گرد عاصف احمد شیخ اور بجبہاڑہ کے عادل ٹھوکر کے رہائشی مکانات کو انہدام کا سامنا کرنا پڑا تھا، جن پر پہلگام حملے میں ملوث ہونے کے ثبوت ملے تھے۔ حکام نے یہ بھی بتایا کہ دہشت گردوں کے خلاف اس طرح کی کارروائیاں آئندہ بھی جاری رہیں گی اور عوام کو ہدایت کی گئی ہے کہ وہ دہشت گردوں کی پناہ دینے یا ان کی مدد کرنے سے گریز کریں۔ واضح رہے کہ یہ کارروائیاں دہشت گردوں کے خلاف حکومتی عزم کا حصہ ہیں، جس کا مقصد کشمیر میں دہشت گردی کے بڑھتے ہوئے اثرات کو کم کرنا ہے۔

Source: uni urdu news service