Sports

’ایج لگنے کے باوجود ناٹ آؤٹ، ٹیکنالوجی نے مجھے بچا لیا‘

13/08/26

آسٹریلیا کے مایہ ناز بیٹر اسٹیو اسمتھ نے بنگلادیش کے خلاف میچ میں ایج لگنے کا اعتراف کرلیا ہے۔

ڈارون میں کھیلے جارہے ٹیسٹ میچ میں آسٹریلیا نے ٹاس جیت کر پہلے بیٹنگ کا فیصلہ کیا تو بنگلادیش کی شاندار بولنگ کی بدولت صرف 198 رنز پر آل آؤٹ ہوگئی۔

بنگلادیش نے دن کے اختتام پر ایک وکٹ پر 96 رنز بنالیے ہیں اور انہیں آسٹریلیا کی برتری ختم کرنے کے لیے مزید 102 رنز درکار ہیں۔

آسٹریلیا کی جانب سے اسٹیو اسمتھ نے 71 رنز کی اننگز کھیلی تاہم ایک موقع پر وہ کیچ آؤٹ ہوئے لیکن ٹیکنالوجی کی وجہ سے وہ خوش قسمت رہے۔

ویڈیو میں دیکھا جاسکتا ہے کہ اسمتھ 7 رنز پر بیٹنگ کررہے تھے جب بولر نے کیچ کی اپیل کی لیکن امپائر کمار دھرما سینا نے انہیں ناٹ آؤٹ قرار دیا، بنگلادیش نے امپائر کے فیصلے کے بعد ریویو لیا تاہم اسنیکو ٹیکنالوجی میں واضح دکھائی دیا کہ ایج نہیں لگا ہے اس طرح وہ آؤٹ ہونے سے بچ گئے۔

دن کے اختتام پر پریس کانفرنس میں صحافی نے اسٹیو اسمتھ سے سوال کیا کہ کیا ایج لگی تھی جس پر انہوں نے کہا کہ ہاں، مجھے ایسا لگتا ہے۔

انہوں نے ایک اور سوال کے جواب میں کہا کہ ہاں میں خوش قسمت رہا، کبھی کبھی قسمت آپ پر مہربان ہوجاتی ہے، ٹیکنالوجی نے آج مجھے بچا لیا۔

ایک اور سوال پر ان کا کہنا تھا کہ ٹیکنالوجی اچھی ہے شاید ایج نہ لگی ہو لیکن میں نے کچھ ایسا محسوس ضرور کیا تھا، اگر امپائر آؤٹ دیتے تو میں چلا جاتا۔

Source: Admin