وقارآباد: تلنگانہ کے وقارآباد ضلع میں محبت کی شادی کے معاملے پر اپنے والدین کو مبینہ طور پر قتل کرنے والی ایک نوجوان خاتون نے جیل سے ضمانت پر رہائی کے بعد خودکشی کرلی۔

متوفیہ کی شناخت یچرم گاؤں، بنٹوارم منڈل کی رہنے والی نکّا سریکھا کے طور پر ہوئی ہے۔ اطلاعات کے مطابق، سریکھا نے جنوری میں مبینہ طور پر اپنے والدین کو نشہ آور انجکشن دے کر قتل کردیا تھا۔ بتایا جاتا ہے کہ اس کے والدین انسٹاگرام کے ذریعے جان پہچان والے ایک نوجوان سے اس کی شادی کے خلاف تھے۔
والدین کے قتل کے معاملے میں سریکھا جنوری سے جیل میں تھی اور 31 جولائی کو ضمانت پر رہا ہوئی تھی۔ رہائی کے بعد وہ روزگار کی تلاش میں سنگاریڈی کے شانتی نگر میں واقع ایک نجی ہاسٹل میں مقیم تھی۔

اطلاعات کے مطابق، 23 اگست کی نصف شب سریکھا نے مبینہ طور پر ایک خودکشی نوٹ لکھا، جس میں کہا گیا تھا کہ وہ مزید زندہ نہیں رہنا چاہتی۔ اس کے بعد اس نے مبینہ طور پر نشہ آور انجکشن لے لیا، جس کے نتیجے میں اس کی موت ہوگئی۔

پولیس نے واقعے کی تحقیقات شروع کردی ہیں اور مبینہ خودکشی نوٹ سمیت دیگر شواہد کا جائزہ لیا جا رہا ہے۔ واقعے سے متعلق مزید تفصیلات کا انتظار ہے۔