جے پور، 04 جون :) راجستھان کے سابق وزیر اعلیٰ اور کانگریس کے سینئر لیڈر اشوک گہلوت نے بھارتیہ جنتا پارٹی (بی جے پی) پر اودے پور کنہیا لال قتل کیس کے حوالے سے سیاست کرنے کا الزام لگاتے ہوئے کہا ہے کہ اگر یہ کیس راجستھان پولیس کے پاس رہتا تو ممکنہ طور پر کانگریس حکومت کے دور میں ہی سزا سنا دی جاتی، لیکن لگتا ہے کہ بی جے پی اس معاملے پر صرف سیاست کر رہی ہے اور متاثرین کو انصاف دلانے کا ان کا کوئی ارادہ نہیں ہے ۔مسٹرگہلوت نے بدھ کے روز اپنے بیان میں یہ بات کہی۔ انہوں نے کہا کہ اودے پور کے کنہیا لال قتل کیس کے حوالے سے بی جے پی نے جم کر سیاست کی اور اسے راجستھان کے انتخابات کا مرکزی ایشو بنا دیا تھا۔ انہوں نے کہا کہ واقعے کی رات ہی اس کیس کو نیشنل انویسٹی گیشن ایجنسی (این آئی اے ) نے اپنے ہاتھ میں لے لیا تھا۔ بی جے پی کی مرکزی حکومت کے ماتحت آنے والی ایجنسی این آئی اے کے پاس یہ کیس ہے ، لیکن تین سال تک مقدمہ چلنے کے باوجود اس واضح نوعیت کے معاملے میں اب تک ملزمان کو سزا نہیں ہو سکی۔ انہوں نے کہا کہ کنہیا لال کے لواحقین نے بتایا ہے کہ اس کیس کو فاسٹ ٹریک پر نہیں چلایا جا رہا ہے ۔ یہ کیس این آئی اے کورٹ جے پور میں زیر سماعت ہے ۔ این آئی اے کورٹ کا ایڈیشنل چارج سینٹرل بیورو آف انویسٹی گیشن (سی بی آئی) کورٹ کے جج کے پاس تھا، جن کا تبادلہ ہو گیا ہے ، جس کی وجہ سے کیس کی سماعت نہیں ہو پا رہی۔ گزشتہ چھ ماہ سے کیس میں کوئی تاریخ نہیں پڑی۔ اس سے قبل گواہوں کے بیانات ہی چل رہے تھے ، لیکن تین اہم گواہوں کے بیانات اب تک درج نہیں کیے گئے ۔ اس کیس میں گرفتار کیے گئے ملزمان میں سے اب تک دو کی ضمانت ہو چکی ہے ۔

Source: Uni News