بالی ووڈ کے معروف اداکار عمران خان نے 10 سال بعد فلمی دنیا میں واپسی سے قبل اپنے مداحوں کے لیے خصوصی پیغام جاری کیا ہے۔

43 سالہ اداکار نے 2015ء میں کنگنا رناوت کے ساتھ فلم کٹی بٹی میں اداکاری کے بعد اچانک فلمی دنیا سے کنارہ کشی اختیار کر لی تھی تاہم اب ان کے مداح ایک بار پھر اداکار کو بڑے پردے پر ایک دلچسپ اور مزاح سے بھرپور رومانوی کامیڈی فلم میں دیکھنے کے منتظر ہیں۔

عمران خان رومانوی کامیڈی فلموں میں اپنی اداکاری کے لیے خاصی شہرت رکھتے ہیں، جنہیں ناظرین کی جانب سے بھی بھرپور پذیرائی ملتی رہی ہے۔

فلم دہلی بیلی کے اداکار اب ’ادھورے ہم، ادھورے تم‘ کے نام سے بننے والی ایک رومانوی کامیڈی کے ذریعے فلمی دنیا میں واپسی کے لیے تیار ہیں۔

فلم کی ریلیز سے قبل عمران خان نے مداحوں کو اپنی آنے والی فلم کے بارے میں آگاہ کرتے ہوئے اپنی فلمی دنیا میں واپسی کی تصدیق بھی کر دی۔

میڈیا رپورٹ کے مطابق عمران خان نے مداحوں سے گفتگو کرتے ہوئے کہا کہ دانش اسلم کی ہدایت کاری میں بننے والی فلم ’ادھورے ہم، ادھورے تم‘ اس بات کا شعوری ردِعمل ہے کہ آج کی فلموں میں بعض کہانیوں اور جذبات کی عدم موجودگی کو کس طرح محسوس کیا جا رہا ہے، ہماری فلم ایک بالغ رومانوی کامیڈی ہے۔

بھارتی اداکار نے کہا کہ اگر ناظرین نے میری سابقہ رومانوی کامیڈی فلموں کو پسند کیا ہے تو وہ اس فلم سے بھی یقیناً لطف اندوز ہوں گے۔

انہوں نے کہا کہ اگر آپ کو میری رومانوی کامیڈی فلمیں، جیسے آئی ہیٹ لو اسٹوریز، بریک کے بعد، ایک میں اور ایک تو اور میرے برادر کی دلہن پسند آئی تھیں، میری ان تمام رومانوی کامیڈی فلموں کا امتزاج آپ کو اچھا لگا تھا تو 10 سال بعد یہ فلم آپ ہی کے لیے ہے۔

جلد نیٹ فلکس فلم میں عمران خان اداکارہ بھومی پڈنیکر کے ساتھ اسکرین شیئر کریں گے، فلم اس وقت پوسٹ پروڈکشن کے مرحلے میں ہے اور توقع ہے کہ اسے 2026ء کے اواخر میں ریلیز کیا جائے گا۔