اتحادی فوج نے یمن میں حوثی اہداف کے خلاف فوجی آپریشن کرتے ہوئے حوثیوں کی بیلسٹک میزائل ذخیرہ کرنے والی 5 تنصیبات تباہ کر دیں۔

ترجمان اتحادی فوج کے مطابق آپریشن حوثی ملیشیا کی جانب سے لاحق خطرات کو ختم کرنے کے لیے کیا گیا، حوثیوں کے زیرِ کنٹرول علاقوں میں بیلسٹک میزائل ذخیرہ کرنے کی 5 تنصیبات اور میزائل داغنے کے 4 پلیٹ فارمز تباہ کر دیے گئے۔

بیان میں کہا گیا ہے کہ حوثی ملیشیا کے بیلسٹک میزائل نیٹ ورک کو ختم کرنے کے لیے کارروائی جاری ہے۔

سعودی قیادت میں اتحادی فوج کے مطابق حوثی ملیشیا کی جانب سے سعودی عرب کے جنوبی علاقے کی طرف داغے گئے 10 بیلسٹک میزائل بھی روک کر تباہ کر دیے گئے جبکہ ریاض کی جانب داغا گیا ایک اور بیلسٹک میزائل بھی فضائی دفاعی نظام نے تباہ کر دیا۔

گزشتہ روز سعودی عرب کی جانب داغے گئے حوثی ملیشیا کے میزائلوں کو فضائی دفاعی نظام نے روک کر تباہ کر دیا تھا تاہم ان کا ملبہ گرنے سے 2 افراد زخمی ہو گئے تھے۔

سعودی محکمۂ شہری دفاع کے مطابق خمیس مشیط اور احد رفیدہ گورنریٹس میں 2 تباہ شدہ بیلسٹک میزائلوں کا ملبہ گرنے سے 1 سعودی شہری اور 1 ایشیائی باشندہ زخمی ہوا جبکہ 3 رہائشی عمارتوں اور 7 گاڑیوں کو نقصان پہنچا۔