بنگال کے وزیر اعلیٰ دو متوفین کے اہلِ خانہ سے ملاقات کے لیے وزیر کو بہار بھیجیں گے
بنگال کے وزیر اعلیٰ شوبھندو ادھیکاری نے اتوار کو کہا کہ وہ 17 اکتوبر کو چوربگان درگا پوجا پنڈال میں بھگدڑ کے دوران ہلاک ہونے والوں کے گھروں کا دورہ کر رہے ہیں۔ انہوں نے بتایا کہ وزیر امیش رائے دو متوفین کے اہلِ خانہ سے ملاقات کے لیے بہار جائیں گے۔
چوربگان درگا پوجا پنڈال میں اچانک موسلادھار بارش کے دوران پیش آنے والے اس حادثے میں مجموعی طور پر 19 افراد کی موت ہوئی تھی۔ ان میں سے 17 مغربی بنگال کے رہنے والے تھے، جبکہ دو افراد پڑوسی ریاست بہار کے مظفر پور ضلع سے تعلق رکھتے تھے۔
شوبھندو ادھیکاری نے شمالی کولکاتا کے چورباگان میں 17 اکتوبر کو پیش آنے والے حادثے کی متاثرہ کلپنا جانا کے گھر کا دورہ کرنے کے بعد صحافیوں سے کہا، ”میں وزیر مملکت امیش رائے کو معاوضے کے چیک کے ساتھ مظفر پور بھیج رہا ہوں۔“
وزیر اعلیٰ نے کہا کہ اتوار کو مشرقی مدنی پور ضلع کے رام نگر میں جانا خاندان کے گھر جانے کے ساتھ ہی وہ مغربی بنگال میں ہلاک ہونے والے تمام 17 افراد کے اہلِ خانہ سے ان کے گھروں پر ملاقات کر چکے ہیں۔ انہوں نے کہا، ”جس طرح متوفین کے اہلِ خانہ غم زدہ ہیں، اسی طرح حکومت کو بھی اس حادثے کا دکھ ہے۔“
انہوں نے مزید کہا، ”میں نے ان کے بچوں سے کہا کہ جس طرح ان کے والد اور چچا ان کے ساتھ تھے، اسی طرح میں بھی ان کے ساتھ ہوں۔ انہیں کسی بھی چیز کی ضرورت ہو تو وہ مجھ سے رابطہ کر سکتے ہیں۔“
مغربی بنگال حکومت نے بھگدڑ کی تحقیقات اور مناسب سفارشات پیش کرنے کے لیے کلکتہ ہائی کورٹ کی ریٹائرڈ جج جسٹس انندیتا رائے سرسوتی کی سربراہی میں چھ رکنی خصوصی تحقیقاتی ٹیم (ایس آئی ٹی) تشکیل دی ہے۔وزیر اعلیٰ نے ایک بار پھر کہا کہ ایس آئی ٹی کو اپنی رپورٹ پیش کرنے کے لیے تین ماہ کا وقت دیا گیا ہے اور اس کی رپورٹ ریاستی اسمبلی میں پیش کی جائے گی۔