بھج/احمد آباد، 16 ستمبر : وزیر اعظم نریندر مودی نے پیر کو کہا کہ جس وقت ہندستان دنیا میں ترقی کا برانڈ بن رہا ہے، اسی وقت اقتدار کے لالچ میں ملک میں کچھ لوگ حملہ کر رہے ہیں۔ ملک کی یکجہتی اور سالمیت پر حملہ کرکے ٹکڑے ٹکڑے کرنے کی کوشش کررہے ہیں۔ وزیر اعظم بننے کے بعد اپنی تیسری میعاد میں گجرات کے اپنے پہلے دورے میں مسٹر مودی نے آج احمد آباد میں ایک بہت بڑے جلسہ عام میں 8.5 ہزار کروڑ روپے سے زیادہ کے ترقیاتی منصوبوں کا سنگ بنیاد رکھا اور افتتاح کیا۔ اس پروگرام میں گجرات کے گورنر آچاریہ دیوورت، وزیر اعلی بھوپیندر پٹیل اور مرکزی وزیر سی آر پٹیل نے بھی شرکت کی۔ جن منصوبوں کا سنگ بنیاد رکھا گیا یا افتتاح کیا گیا ان میں سماکھیالی - گاندھی دھام- آدی پور ریلوے لائنوں کو چار گنا بڑھانا، اے ایم سی، احمد آباد میں بڑی سڑکوں کی ترقی اور بکرول، ہاتھیجن، رامول اور پنجرپول جنکشن پر فلائی اوور پلوں کی تعمیر شامل ہیں۔ وزیر اعظم نے 30 میگاواٹ کے سولر پاور پلانٹ، کچھ لگنائٹ تھرمل پاور پلانٹ، کچھ میں 35 میگاواٹ کے بی ای ایس ایس سولر پی وی پروجیکٹ اور موربی اور راجکوٹ میں 220 کلو وولٹ سب اسٹیشن کا بھی افتتاح کیا۔ وزیراعظم نے انٹرنیشنل فنانشل سروسز سینٹر اتھارٹی کے سنگل ونڈو آئی ٹی سسٹم کا آغاز کیا جو مالیاتی خدمات کو ہموار کرنے کے لیے ڈیزائن کیا گیا ہے۔ انہوں نے پردھان منتری آواس یوجنا گرامین کے تحت 30 ہزار سے زیادہ مکانات کی منظوری دی اور ان مکانات کے لیے پہلی قسط جاری کی، ساتھ ہی پی ایم اے وائی اسکیم کے تحت مکانات کی تعمیر کا آغاز کیا۔

Source: uni news